陳寶珠現身尖沙咀聖誕亮燈儀式 台上發言憶摯友谷薇麗感觸拭淚

撰文:吳子生
出版:更新:

陳寶珠今晚(17/11)以香港血癌基金愛心大使身份,現身尖沙咀出席聖誕亮燈儀式。她在台上發言分享感受時,憶起已故摯友、曾長期擔任香港血癌基金會長的谷薇麗(Linda),期間更一度感觸落淚,並拿出紙巾抹眼淚,場面令人動容。

陳寶珠今晚出席聖誕亮燈儀式。(葉志明攝)

台上發言難掩思念拭淚 盼大眾延續好友行善志向

活動上,陳寶珠談及與香港血癌基金一同走過的25年歷程,提到半年前離世的好友Linda時難掩思念之情,不禁在台上眼泛淚光,需用紙巾拭淚。她哽咽表示,往年這個時候都會與對方相聚傾談: 「每一年呢個時候,我都會同Linda喺一齊,我哋一齊上嚟傾偈。幾個月前,Linda去咗另外一個天堂、另外一個世界。今年Linda唔喺度,但係佢嘅精神同埋佢個志向,仍然係陪住我哋嘅。」

陳寶珠台上憶故友感觸落淚。(葉志明攝)

她讚揚Linda生前透過血癌基金幫助了無數有需要的人,並衷心呼籲大眾繼續支持慈善,延續好友的遺願:「希望大家喺未來嘅日子,繼續延續Linda嘅志願,幫助有需要嘅人,多啲捐錢,多啲為有需要嘅人做事,等佢哋有個溫馨嘅屋企。雖然Linda唔係同我哋一齊,但佢而家喺天上,會睇到我哋,會同我哋一齊享樂呢個時刻。」

剛完成白內障手術 無懼強光親身呼籲

主持人在台上透露,陳寶珠早前剛剛接受了白內障手術。雖然現場舞台射燈強烈,對眼睛而言未必十分舒服,但為了支持香港血癌基金及呼籲大眾行善,她仍堅持親身出席活動,敬業與善心贏得全場掌聲。

陳寶珠剛完成白內障手術。(葉志明攝)

坦言年紀大減少外出 聖誕留家溫馨度過

近年較少公開露面的陳寶珠,被問及近況時笑言自己如今大多時間都留在家中,生活相當愜意: 「我個近況,喺屋企囉!我好少出街嘅,唔知係咪年紀比較大咗啦,越嚟越唔想出街,好多公眾場合嘅聚會我都盡量少出去。可能個心態唔同啦,但係仍然係好開心咁過每一日。」

陳寶珠坦言年紀大減少外出。(葉志明攝)

至於即將來臨的聖誕佳節,陳寶珠表示不會外出湊熱鬧,而是選擇與至親好友在家中低調慶祝:「我多數都係喺屋企嘅,唔會出街。有啲朋友同埋屋企人,少少嘅人大家喺屋企一齊食個聖誕大餐,傾下偈,過一個好溫馨嘅聖誕。」