肥媽霸氣回應被out《中聲5》唔會去問高層:又唔係你話事

撰文:陳釗
出版:更新:

無綫日前於節目巡禮正式公布將舉辦《中年好聲音5》,當中一句「全新評審陣容」惹來網民熱議,猜測是否「大換血」,甚至有傳言指元老級評審肥媽(Maria Cordero)將「無份」參與新一季節目。肥媽今日(18日)出席台慶拜神,接受訪問時,對於被指遭「Foul」出《中年5》表現得相當豁達,更笑言自己現時工作排山倒海,儼如「空中飛人」。

台慶挑戰「閃身步」

肥媽透露台慶上除了會與《中年好聲音》唱歌跳舞外,更預告會挑戰熱爆舞步「閃身步」,雖然難度高,但幸好自己最近有在家裡操練,「可能佢哋見我最近成日喺屋企跳舞,所以就諗起我。」並呼籲觀眾拭目以待。

肥媽台慶表演「閃身步」。(葉志明 攝)

霸氣回應無緣《中年5》:唔係你話事,亦唔係我話事

對於網民猜測她與周國豐被「Foul」出《中年好聲音5》評審席,肥媽直言節目尚未正式開始,但之前公司曾向她提及過有這個節目,現在落實當然最好。被問到會否主動向無綫高層「問一問」究竟,肥媽坦言:「梗係唔會問啦呢啲嘢!(妳係節目台柱喎?)你話啫,我喺你個台就柱了。唔可以咁樣㗎嘛,梗係等上頭嘅命令落嚟㗎嘛!又唔係你話事,又唔係我話事,係咪呀?我哋呢啲『On Call』,你叫我就返工,好簡單㗎咋嘛!」

肥媽霸氣回應無緣《中年5》。(葉志明 攝)

肥媽更自爆未來八個月的檔期早已爆滿,已叮囑經理人及所有Agent在《中年》系列暫停期間「盡量畀我做嘢」。她細數未來行程指,20日便飛往美國登台,其後更要連飛三藩市、洛杉磯、多倫多、新加坡及雲頂等地巡演,笑言自己在《中聲5》前是「空中飛人」,將主持《中聲》時的錢,一次過賺回來。

肥媽稱最開心是,登台賺錢之餘,又能探望一下在外國的孫仔孫女,並會將全部歌酬貢獻給他們,「而家啲錢唔使唔值錢架啦,做婆婆、嫲嫲,最開心就係可以『跌』錢。同埋啲孫仔孫女知我嚟,已經講明想食啲咩,又乾炒牛河、豉油雞,仲有蘿蔔糕,好刁鑽。不過,食嘢係可以俘虜晒佢哋個心。」

肥媽透露稍後飛外國多個城市登台,笑言自己變「空中飛人」。(葉志明 攝)

樂意提攜後輩

雖然未知能否再任《中年5》評審,但肥媽對過去幾季的《中年好聲音》參賽者充滿感情,直指當這班學員是自己的「仔女」,即使未能入十強的,她和黑妹也會為學員爭取工作機會,直言作為前輩應該「伸隻手去拉一拉」後輩:「人哋叫你一聲前輩,你點樣去做人前輩呢?好似《中聲1》時,我喺紅館開演唱會,寧願自己唔唱Encore部分,都要畀晒佢哋上去,因為我唔知你呢一世有冇機會上紅館唱歌,但呢個機會我畀你,希望你一生難忘。」

肥媽近日與李家鼎(鼎爺)合作拍攝飲食節目,由於她即將飛往美國,故已率先完成自己的拍攝部分。她大讚鼎爺狀態非常好,火氣依舊。(葉志明 攝)