許志安虛心感謝周啟生批評爵士演唱會:下次努力希望唔令佢失望
許志安今晚現身《萬千星輝賀台慶》擔任壓軸嘉賓,他近日做了兩個演唱會,分別是《On Stage》及《西九爵士音樂節》,口碑大好,不過在後者舉行完之後,「樂壇判官」周啟生卻批評其爵士演唱會:「走音部分都費事講。完全冇爵士嘅任何元素,jazzfest my Ass!」許志安虛心接受周啟生意見:「我好多謝呢個前輩就真!我知道之後,我會諗首先我會講可能有個誤會,因為我今次呢個Jazz Festival,佢搵我係希望透過我嘅流行歌曲,加一個Jazz嘅編曲,希望有唔同嘅火花可以做出嚟俾大家睇,呢個我都好期待。但係真係唔係一個純Jazz,因為我自己可能有試過,喺演唱會度有講過93年我有兩首Jazz嘅歌,我都覺得好難得幾十年之後有機會唱返,但係除此之外我都冇乜點掂過,所以今次對我嚟講係新嘅嘗試、新嘅火花,所以周生有一個Suggest,覺得我唔夠Jazz,我諗係小小嘅誤會。我有檢討過,每次表演都有唔同事情發生,可能再有多啲進步空間,我覺得周生可能希望我第時有多啲進步、提醒,反而我覺得係多謝,下次再努力啲唱好啲,希望唔好令佢失望。」他表示心情未受影響:「唔會影響心情,呢個係提醒,真心覺得,其實都係可以有進步空間,咁所以冇咩唔開心。」
講到早前做完紅館演唱會,他預告將會開始巡迴,暫定有澳門及馬來西亞站,城市就留待公司安排:「我最想如果有機會嘅話,就係喺香港開最後尾嘅終站,呢個都係我自己幻想,如果有機會先。」上次紅館只得三場,歌迷表示「未夠喉」,安仔透露:「上次其實我哋公司有『囈』紅館可以比多場,因為佢裝修,但係可能工程有啲延誤。好開心有咁嘅反應,但係結果唔得,唔緊要,我哋期待再有一啲好嘅地方。(記者:開啟德囉,Sammi都開。)可能對我嚟講太遙遠。」