賴彥妤撞爆下巴見骨留疤痕 樂觀自嘲變「天然陰影」:瘦咗尖咗

撰文:吳子生
出版:更新:

無綫《萬千星輝賀台慶》今晚(19/11)隆重舉行,一眾女藝人盛裝出席並落力演出。早前於Instagram發文透露意外撞傷下巴、一度擔心毀容的「女神」賴彥妤(Vivienna),今晚亦以一身黑色皮褸短裙現身台慶,並完成全女班舞蹈演出。她於後台接受《香港01》訪問時,首度詳談驚險受傷經過,更自爆當時傷口深至見骨,縫針後竟立即趕返公司開工!

賴彥妤今晚出席台慶。(胡凱欣攝)

排舞前夕打高爾夫球出意外 絆倒直撞長凳「嘭」一聲

賴彥妤透露,今次意外發生在台慶舞蹈排練的前一日。當時她剛打高爾夫球,卻因一時未有留意地面情況而釀成意外。憶述事發一刻,她仍猶有餘悸:「因為有嚿石喺地下,我睇唔到,踢到嚿石之後成個人失平衡,我又冇隻手去撳其他嘢,前面咁啱有張凳,我就冇晒力咁樣撞咗落去,係『嘭』一聲,仲要跌埋落地咁樣,嚇親我隔離啲朋友!」

賴彥妤憶述事發一刻。(胡凱欣攝)

傷口深至見骨當場爆哭 縫針後趕返公司繼續拍劇

由於下巴直接猛烈撞擊硬物,傷口當場爆開並血流不止。賴彥妤坦言受傷一刻嚇得即時落淚,除了劇痛難當,更擔心影響演藝事業:「我都驚啊,我都喊添啊嗰吓,係啊真係喊啊!一來痛啦,二來我係好擔心會影響到之後啲工作啊,或者真係會……始終塊面嚟㗎嘛,好驚破相啊!」

賴彥妤稱當時傷口頗深甚至見骨,需要立即縫針。(胡凱欣攝)

她隨即前往醫院求醫,醫生檢查後發現傷口頗深甚至見骨,需要立即縫針。然而敬業的她當晚仍要為台慶排舞,竟在急症室催促醫生盡快完成縫合:「我係催個醫生話:『啊,點呀?縫完針未呀?我要趕住返公司再拍嘢同埋練舞!』醫生都話你唔休息仲要返去,叫我好好休息吓,唔好郁咁多。」

負傷上陣「黑面」排舞 笑言留疤變「天然陰影」

今年是賴彥妤第五年參加無綫台慶,她直言自己抱持「一係就唔做,一做就希望做到最好」的心態,因此即使受傷亦堅持如常拍劇及排練。她笑言受傷頭幾天開工時猶如「黑面神」:「我嗰陣拍嘢係要『黑面』嘅,因為完全唔敢講嘢啊!講嘢會郁到呢個位,就驚佢爆線。排舞嗰陣太大動作、Fing頭嗰啲我都唔做住,好彩導演同排舞老師都好關心我。」

幸好賴彥妤樂觀,笑言留疤變「天然陰影」。(胡凱欣攝)

如今傷口已大致癒合並拆線,被問及會否擔心留下疤痕,賴彥妤即發揮幽默本色,笑指下巴底的疤痕反而帶來「瘦面」效果:「其實都有疤,不過好彩佢收埋咗喺下巴底少少,有『天然陰影』,即刻瘦咗同尖咗!不過依家好返啲,我都開始要做啲去疤嘅工作囉,可能飛轉韓國啦!」