張曦雯台慶性感戰衣無需吳卓羲過目 全程難掩甜笑:佢只可以話靚
張曦雯(Kelly)昨晚(19日)盛裝打扮,以喱士連身裙現身《萬千星輝賀台慶2026》,雖然緋聞男友吳卓羲(Ron)未有到場,但訪問還是句句圍繞吳卓羲,令Kelly難以招駕,問到一身性感打扮有否被Ron過目,她雖然答:「使乜問呀?現代女性有自主權!」但還是難免全程甜笑,又指:「佢都冇得揀㗎啦,只可以話靚。」日前Kelly去睇BIGBANG演唱會,被問Ron有否同行,她大賣關子指有男有女,問到若與另一半出街,是否無需避忌,Kelly就說:「我不嬲同另一半出街,由細到大都冇避忌過嘅。」
當晚天氣轉涼,身穿薄紗喱士裙的Kelly直言非常寒冷,貼了幾個暖包禦寒。她透露這套戰衣前一晚才正式敲定,雖然原本有另一個選擇,但最終選擇這條由越南設計師設計的作品:「條裙擺落手係輕到好似一塊好輕嘅喱士布,但係着上去我覺得好睇。」
吳卓羲未睇過性感戰衣:佢都冇得揀㗎啦,只可以話靚
不過全場焦點依然落在吳卓羲身上,被追問戰衣有否事先給阿Ron過目,Kelly即甜笑說:「唔講佢啦!哈哈,今日Focus係我呀。」至於對方會否喜歡,她霸氣回應:「咁你鍾唔鍾意吖?你哋鍾意咪得囉,我自己鍾意咪得囉。」她更自言事前完全沒有傳照片給阿Ron,所以記者比阿Ron更先睹為快:「冇,佢睇電視咪睇到囉。同大家都一樣,你哋率先預覽咪得,你哋地位高過佢。(問:如果要投服裝獎,你覺得佢會唔會投你?)佢都冇得揀㗎啦,只可以話靚。」問到以後穿著性感服飾前,會否都先被Ron過目,她表示:「使乜問呀?現代女性有自主權,同埋我希望都冇乜失手,我嘅record都OK,我同我團隊都好有信心。」
公開承認獲吳卓羲追求後被追問 搞笑避答:共識係TVB生日快樂
由於Kelly前日(18日)才公開承認正獲吳卓羲追求,記者隨即追問她有否收到大批祝福,Kelly搞笑反擊:「收到你哋祝福囉!」她表示粉絲向來愛錫自己,父母亦由細祝福到大,隨即再次把話題拉回台慶:「我都話今日個主旨係我,佢又唔喺度,係咁講佢做乜啫?」被問到阿Ron有何反應,以及兩人有否就公開關係達成共識,她直言對方沒有特別反應,只說:「我哋嘅共識就係希望TVB生日快樂,59周年good show。」
被記者問到忘記舞步 張曦雯拒找吳卓羲教路
提到當晚有份參與由羅嘉良(撈家)揭幕的台慶跳舞表演,Kelly笑言身邊朋友都關心她練舞進度,更向記者說:「俾你哋問到我啲舞步都唔記得晒。」記者順勢提議叫舞林高手阿Ron教路,她即笑指:「好多年前啦,佢跳舞!其實我自己跳舞都好叻嘅,唔使問㗎。」至於大抽獎環節,向來零抽獎運的她坦言從未中獎,前日綵排時更不幸被抽中做「試抽」嘉賓,令她當場呆住心知不妙、打定輸數:「尋日綵排嘅時間佢哋揀咗我出嚟,我就覺得唔好,通常俾人揀出嚟試嗰個,都係正式都係冇㗎啦,我都呆咗,心諗,唉……即係聽日冇份。」
BIGBANG演唱會避談吳卓羲有否同行 自言與另一半出街從不避忌
日前Kelly去啟德主場館睇BIGBANG演唱會,她說是跟一班朋友、有男有女一起去,被問到同行友人當中「有冇姓吳㗎?」,她即發揮急才神回:「我淨係識G-Dragon,姓G嘅有。」至於阿Ron是否同樣喜歡BIGBANG,她則推說「要問吓佢喎」,至於若與另一半出街,是否已不再避忌,Kelly直言:「我不嬲同另一半出街,由細到大都冇避忌過嘅。」此外,劇集《璀璨之城》早前已播完,不再有宣傳活動,被問到與阿Ron見面時間會否大幅減少,抑或私下也經常見面,Kelly笑稱:「見你哋多啲囉,日日都見你哋」。面對記者起哄要求她帶同吳卓羲一起受訪,Kelly無奈又甜笑地拋下一句:「你哋自己約啦!總有一日佢都冇得揀要見你哋嘅。」