【維基洩密？】王浩信朱千雪奪視帝視后　網友最期待畫面出現

今個星期日就係TVB台慶頒獎典禮，視帝視后人選傳得火紅火熱，不外乎是陳展鵬與胡定欣這對緋聞男女。不過，今日就發現著名「百科全書」維基百科，疑似流出今屆台慶得獎名單，結果就有點反高潮。視帝視后分別是《EU超時任務》的王浩信與朱千雪；最佳女配角一直都是王君馨與龔嘉欣之爭，跑出的卻是長腿Natasha楊秀惠，與現實所推測大有出入，似是網民FF過度。於是有其他網民不禁留言表示：「改嗰條友睇得《EU》太多喇！」、「最佳男配角唔係高天鷲已經可以上一頁」，不過都有人話：「我撐呢個結果。」各有睇法，有辣有唔辣，任君選擇。

對於台慶頒獎禮得獎名單「流出」，無綫有關方面就回應：「《維基百科》向來都可以自由更改，仲要任何人都改得，所以都係不能盡信啦。」至於網民貼唔貼得中？無綫都叫大家18號睇電視就知！相信一班「鬧住睇」的網民都會緊密留意整個頒獎禮㗎啦，睇下會唔會FF成真啦！