無綫一日四齣飲食節目 網民：睇到都覺飽滯
撰文：陳浩賢
出版：更新：
無綫製作的通病，往往是只要有節目受歡迎，就會一直開拍第二輯、第三輯，甚至會再開拍同類型節目，睇到觀眾覺得厭煩先肯收手，像《愛．回家》系列，就已經有《八時入席》及《開心速遞》，而繼李家鼎的《阿爺廚房》後，亦連隨用《愛．回家》的馬家成員推出《馬家開飯》，但原來週日更加誇張，竟然一日播四齣飲食節目，網民就話睇到飽飽滯滯。
黃淑儀先後主持過《吾淑吾食》及《吾湯吾水》，今次再拍《吾淑吾食澳洲篇》。（網上截圖）
有心水清的網民發現，無綫翡翠台週日的節目，早上6時有周汶錡主持的《咁至識食》、下午3時20分是肥媽的《搵食》，晚上7時30分，則是麥包、江美儀及滕麗名，帶觀眾行街市買靚餸的《街市遊樂團》第二輯，到了8時，黃淑儀主持的《吾淑吾食澳洲篇》，雖然叫做有得出埠拍外景，但內容也是換湯不換藥的教人揀食材及煮番兩味，幾齣同類型的飲食節目洗腦式無限Loop。
麥包、江美儀、滕麗名及陳浚霆主持的《街市遊樂團》第二輯，繼續教大家如何揀靚餸。（網上截圖）
無綫近年不停開拍飲食節目，無非是製作慳水慳力，只需主持加上煮食時的廠景，外景則多數是拍下街市，但之後的冠名贊助及植入式廣告卻多籮籮，包括豉油、雞粉等調味料，廚房爐具等各式各樣廣告，拍飲食節目可謂本小利大。但無綫此舉對觀眾當然不是好事，網民對於無綫的節目安排，紛紛留言「食滯曬啦，咁多飲食節目」、「只是贊助商曲線植入式及冠名廣告」、「索性開拍城寨開飯」，齋看網民激烈反應，也知過多的飲食節目其實十分趕客，終會面對收視下滑的惡果。
早上6時已重播周汶錡、徐淑敏及莫樹錦主持的《咁至識食》。（網上截圖）
肥媽主持的飲食節目《搵食》甚受歡迎，其後再拍攝《食平D》、《食平DD》、《食平3D》，長拍長有。（網上截圖）
星期六開始播映的《馬家開飯》，將《愛．回家》的馬氏一家用到盡。（網上圖片）