余詠珊指《明周》失實報道 澄清:絕對冇中央任命

撰文:黃欣華
出版:更新:

今日(29日)《明報周刊》以封面報導前無綫(TVB)助理總經理余詠珊(Sandy)最新動向,更以《傳余詠珊獲中央委任搞影視平台》作標題,內容指她獲中央委任在香港籌辦一個全新的國營影視平台,更向舊下屬積極招手。不過消息一出,Sandy接受《香港01》訪問時就激動澄清、覺得標題容易誤導,令人有不必要聯想,她說:「冇呀,好驚呀,我嚇親,絕對冇啲咁嘅事,冇中央任命!我自己開咗間製作公司,接咗Open TV啲Project嚟做,我只係想好好幫Open TV做返一啲,我自己覺得可以花啲力、花啲時間做返啲大家都會好開心嘅節目,就係咁多啫。(公司資金來源呢?)都唔關事,都有啲人投資我,但唔係中央資金,而且都係第一轉資金啫,跟住都係自負盈虧。」Sandy指與Open TV屬於外判關係,並不是受聘於Open TV。

余詠珊指與Open TV屬於外判關係。(陳順禎攝)

至於被指暗串TVB無創意,Sandy就稱是一場誤會,並強調是串自己:「其實過去嗰幾年,我有少少對唔住自己個團隊,喺TVB都做得唔好,所以好想趁呢個階段喺一個新環境全力做製作,所以公司叫『好好製作』,意思就係想提自己好好咁做返製作,所以會好花力去諗啲節目可以點樣行,想夜晚多返啲嘢睇,想認真做返多啲資訊性嘅嘢。」