【有樓萬事足.有片】張繼聰謝安琪住過大埔村屋:不應同物質掛勾

撰文:溫菁莉 何志衡
出版:更新:

最近TVB新節目《有樓萬事足》中,22歲參加者Seasun一句「有樓有高潮」、「冇樓唔好白撞」、「有樓等於有安全感」等語出驚人的金句,掀起全城觀眾瘋狂討論。今日《香港01》就搵來一眾藝員,睇下他們有何看法。

張繼聰

張繼聰認為愛情絕對唔可以同物質掛鉤,提到當年由700呎村屋搬到現時4000呎豪宅,過程有無辛酸史?阿聰笑言如果要講,要講幾日。他指如果快樂要同屋企有幾大及月入多少做比較,世界唔會咁精彩,幸福係在乎睇下你點去睇呢個世界。

張繼聰表示要講細屋搬大屋的辛酸史,講幾日也講不完。(黃國立攝)

麥明詩

麥明詩就話自己屋企無2000呎,但就好有安全感。咁另一半係咪有樓先有安全感?佢認為若果兩個人嘅人工可以足夠供樓就已經有安全感。麥明詩直言另一半有無樓絕對唔係交往嘅首要條件,「最重要梗係要專一,因為你有層樓但個人走咗去,都無意思。但有屋企對傳統中國社會來說非常重要,而我都好佩服父母好辛苦咁供一層樓返嚟,佢哋咁辛苦絕對唔會幫到我供第二層,所以都係靠自己努力工作啦。」

麥明詩表示擇偶條件絕非有冇樓,而是個人要專一。(黃國立攝)

李佳芯

對於「有樓有高潮」,Ali就話好容易,「如果自己努力工作搵錢買樓,好容易自己滿足到自己呢個高潮。」她笑言唔需要另一半有樓有錢,「我只係需要愛就夠了,最重要有愛心,啲愛對我係佔大部分,咁就夠㗎啦。」

李佳芯表示自己努力工作搵錢買樓,可以滿足到自己呢個高潮。(黃國立攝)

陳嘉寶

Anjaylia認為每個人對於安全感定義都不同,笑言自己嘅安全感係由細到大攬住瞓嘅公仔,「樓嘅嘢我一向都無,唔可以話我20幾年無安全感㗎嘛。」咁對於另一半係咪有樓先嫁得過?Anjaylia表示最重要是雙方有共同價值觀,買樓嚟講都係覺得自己儲錢買最好。

陳嘉寶的安全感,來自由細到大攬住瞓的公仔。(黃國立攝)