【有樓萬事足】21歲Vivienna標籤90後唔上進:有樓人哋當你神咁拜

撰文:郭敏玲
出版:更新:
Seasun自比母猴,提出公猴論,新奇有趣。

萬眾期待的TVB實況節目《有樓萬事足》終於播出第一集,觀眾留意的不外乎是愛樓愛到出晒面的港女Seasun會有什麼更驚人的發表,還有看她如何解釋那套獨特的價值觀。除了Seasun,還有完全相反的「尋覓真愛女」Inky,雖然已經有樓,但仍渴望有個伴,因為「人生咁先會圓滿」。

有樓別人就會當你係神,會唔會太誇張?!(電視截圖)

原名鄧寶怡的Seasun改名叫鄧湤鉮上節目,一睇個名都覺得複雜,想必有研究玄學風水的Seasun想以新名改運。她所講的「冇樓唔好白撞」、「有樓有高潮」,大家都聽到有啲厭,Seasun再有非正式科學理論,她自比母猴提出「公猴洞穴論」:「母猴就要負責揀條件好嘅公猴,條件好嘅公猴當然要有一個洞穴,個洞穴仲要夠大,如果唔係入到隻母猴,個洞穴就冇位。」這番理論再次令人費解,而音響公司CEO阿龍反擊,覺得Seasun好唔要面,如果一個男人幾個女人分咁點先?結果Seasun好有自信地話:「咁又唔介意,好嘢自然多人爭,不過而家香港係行一夫一妻制。」

除咗Seasun,另外一個仲讀緊書、21歲的少女Vivienna同樣都有金句:「以前話知識改變命運,但而家就係買樓改變命運。」講到自己要26歲前就要買到樓,為了達成目標,雖然讀緊書,但都會做不少兼職,做下model,她聲稱現時月入可以有四萬,高峰期更高達十多萬,真係好得人驚。點解樓對佢咁重要?Vivienna講到甜思思咁:「因為人哋見你有層樓喺手,人哋就會當你神咁拜。」

究竟現在的香港人係咪真係咁膚淺?有個環節就請來Vivienna的大學同學討論,他們都不會視買樓為人生目標,不過Vivienna想點就是她個人的事,不會多講幾句,「佢唔覺辛苦就得啦。」就是因為意見不太一致,Vivienna就話自己喜歡40多歲的男人,因為那個年紀的男人有事業有地位,「證明佢係比較有目標同有自信。」身為90後的Vivienna仲標籤埋現在的90後:「(他們)都冇一個好明確嘅目標,尤其係男仔,玩完就算。」似乎Vivienna持有比其他90後優越的心態。

21歲的Vivienna表示自己想搵年紀較大的男人。
就係咁,作為90後的她,標籤埋一班90後男性唔上進。
Vivienna的見解,相信有不少90後會大喊冤枉。

今集最後就有上了車的32歲單身女Inky,求真愛求到上節目,講到男人冇樓唔緊要,因為佢有,一切問題都好易解決。Inky在節目中講到自己好節儉,就算現時已入手一個小單位,她都是壓價壓了45萬,這其實很正常。不過Inky也分享了慳錢心得,聽到都覺得有啲慘,點解?她講到為慳錢,頭髮一定由自己剪,還剪到有一手好技術;另一個方法就是捱餓,食一餐可以頂成日。Inky提到這種方法叫「餓字訣」,「我好鍾意呢種感覺,因為一餓就會覺得自己有存在感。」Inky身邊朋友講笑,如果男人想食軟飯,Inky是個好選擇。

睇完第一集,重點除了幾位女性的擇偶條件之外,其實不禁會產生疑問,究竟為了買一層樓,係可以去到幾盡?慳錢捱餓,為的是有樓的實在感,其實真是值得嗎?與此同時,下一集預告話你知,有人為了買樓,一日只用50蚊,簡直是沒有最新奇,只有更新奇。

Inky話餓先會有種存在感,好有哲學feel。