劉丹變御用喪妻男 網友強烈要求無綫還丹爺一個「老婆」

撰文:溫菁莉
出版:更新:

相信過往有不少電視迷每晚8點都會捕實電視機睇《愛.回家》,因為劇情夠貼地夠共鳴,更帶挈劇中一眾飾演「馬家」上下嘅演員「入屋」。而昨晚終於播出系列嘅第四輯《愛.回家之開心速遞》,雖然與「馬家」無關,但今次劇中依舊仲有劉丹(丹爺)嘅存在。

昨日播出的《愛.回家之開心速遞》第一集,一開始就已經交代丹爺飾演的熊樹根,其老婆已經去世。(網上截圖)

昨日播出街的第一集就講丹爺飾演嘅熊樹根獨自湊大三個女兒,話咁快就有眼利嘅網友即刻係討論區出post,希望TVB之後可以安排返一個「老婆」俾丹爺。點解咁講?睇返丹爺這幾年參演的劇集,大部份的角色都是喪妻,包括《天與地》飾演的江兆泉、《愛.回家》第一輯飾演的馬虎、《律政強人》飾演的卓繼堯,3部劇集無獨有偶一係無老婆一係就老婆去世。最好笑莫過於係網友推薦新抱楊冪飾演丹爺老婆,但深信丹爺應該接受唔到囉!

于淼係《不懂撒嬌的女人》入面會同丹爺有感情線,真係好期待。(網上圖片)

而網友都建議TVB在之後的劇集可以配年輕女演員俾丹爺,覺得咁會突破。其實TVB一早就已經安排係即將播出嘅劇集《不懂撒嬌的女人》裏,丹爺同于淼有感情戲。于淼今年26歲,而丹爺就72歲,二人相差足足46歲,可以話係「爺孫戀」,雖然年齡不是問題,但相信到時劇集出街又必成為熱話。