【有樓萬事足】無殼夫妻分開住　Henry要喺老婆200呎屋企借宿一宵

《有樓萬事足》本周一首播，主題是「有樓有真愛」。今日第二集，就講時下年青人為買樓可以去到幾盡？分別就有極慳「50蚊男」岑先生及月儲105％90後Macy。兩人講起慳錢大計即時滔滔不絕，但是都有人不同意要窮盡一生去儲錢買樓，令到自己沒有生活，錯失了旅行、增廣見聞的機會。

節目中，有一對夫妻Henry與Hathi，雖然已經結婚，但因為未有能力買到樓，就算簽紙成為合法夫婦，都要分開住，每個星期只有一、兩日見面，相聚一下；有時嫌見面時間太短，Henry會留宿Hathi與家人同住的200尺公屋單位借宿一宵。片段中，Hathi介紹家中陳設，她與老公同睡的空間，僅僅只有四個階磚闊度，十分狹窄。Hathi還指：「其實阿爸阿媽張床同我哋張床係對住，不過佢哋瞓個邊都有啲櫃遮住。」但因為沒有房間間隔，所以Hathi與老公Henry都要被迫「好多嘢都要細細聲講」，而見完面之後，老公Henry就要山長水遠回到天水圍的家，有點頻撲。老公Henry其實都想買到樓，「自己都希望能力嘅時候，咩都畀晒佢。」此番說話令Hathi好感動。

節目講到Henry是全職舞者，而Hathi是自由多重身份工作者，即是Slash，接到工作後，所擔任的崗位是項目助理。Henry過往都試過做Slash，兩人同做Slash時，旁人都覺得他們活得清閒，生活相當輕鬆。後來翻查過Hathi的Facebook，發現她最近就負責行政長官候選人曾俊華宣布參選記者會，並表示：「有幸負責此記招，親身現場。」身為Slash的她，俗稱炒散，曾接受過不少媒體的訪問，講及自己對工作的定義。她提及做了Slash之後，為人更加積極，提升個人競爭力，讓自己可以接到更多工作，她曾經最好景的時候，月入試過6萬、7萬元，但點解仲買唔到樓？原來Slash的代價就是收入不穩定，她曾試過連續幾個月都無工開，即刻騰雞上網搵工，現時幸運地每個月都有一份收入萬多元短期工，總算可以請家人飲飲茶，但樓就未買到了。