陳詩慧（Eva）近月密集式開工，而且躍上大銀幕，在電影《西謊極落之太爆太子太空艙》登場，一人分演多角，又為該片擔任配樂。不過咁她都不是一味死做，亦懂得偷得浮生，完成手頭工作後，Eva隨即放個靚假，飛去英國再去冰島睇北極光。

Eva在冰島期間，原來當地有四個火山隨時爆發，幸好有驚無險，而Eva返港後，才知道有這件事。她笑說：「咁我真係行運啦，可能因為喺冰島見到北極光，仲連續兩晚，啲人話見北極光會帶來好運，所以我都有許願。」置身零度以下的冰島雪地，Eva無懼寒冷，繼續遊覽黃金瀑布、間歇噴泉，但就不慎被泉水噴中塊面，她笑說：「唔知風向吹向我塊臉，俾個噴泉噴到成臉成口都係水，啲水又唔辣嘴，幾好味吖，暖暖哋。」

除此之外，今次歐洲之旅，其實Eva係先去倫敦，一遊London Eye及睇著名音樂劇《綠野仙蹤女巫前傳》(Wicked)，「呢套音樂劇好震撼，好好睇，都吸收吓當地文化，偽文青吖嘛。」來到英國，當然不少得女士至愛，瘋狂濕平啦，她表示：「由香港飛英國，再喺英國等6、7個鐘轉機去冰島，前前後後成廿幾個鐘，遠就遠啲，但享受嘅，我終於第一次見到北極光，真係好開心。」Eva盡興而回，相信會有更多創作靈感，帶給粉絲新的音樂。