ViuTV開拍猛鬼劇《詭探》講西貢結界 邵仲衡:都係真人真事 

撰文:郭敏玲
出版:更新:
《詭探》今日終於開鏡,女主角由朱慧敏變成趙碩之。(manmanlai926 instagram)

 ViuTV自去年10月宣布開拍懸疑劇《詭探》後,今日終於舉行開鏡禮,公開演員陣容。此劇本來由邵仲衡與朱慧敏擔正,不過正式開拍時,女主角變成趙碩之,並飾演私家偵探。男主角邵仲衡今次飾演茅山師傅,戲內會與神靈合作,破解多宗香港奇案。

《詭探》為ViuTV首套一星期播足5集的劇,邵仲衡透露此劇有30集,不止圍繞西貢結界事件:「其實有好多故事,每件都係真人真事,主要同香港有好切身嘅關係,好似小朋友恐怖地鐵廣告、猛鬼公屋啦,邊條村就唔講啦,西貢結界都係近呢幾年都有人講,所以先會有咁大反應。」邵仲衡飾演茅山師傅,特意向真﹒茅山師傅取經,上堂準備了兩、三個月:「主要都係了解下傳統茅山師傅有啲咩巫術、形式呀手印之類,佢哋唔會隨便去使出法術,我去學都係想了解下,令件事更加逼真。」

邵仲衡今次做茅山師傅,特意上兩個月茅山course。(網上圖片)

邵仲衡笑言一開始拍此劇話唔驚就呃人,好多場面都幾恐怖,不過拍時也沒有什麼禁忌:「套劇的本意係好嘅,我喺入面係拜觀音,咁信觀音有啲咩去遵守,大家都好清楚,總之就唔好做虧心事,係想導人向善嘅。」邵仲衡相信套劇拍完,都會安排十點後時段播:「因為有啲場面都幾恐怖,係會嚇破膽,就好似之前已經拍咗一啲電撃嘅鏡頭。加上套劇嘅內容,就唔係好適合合家歡時間到播,要家長指引。」邵仲衡還講到套劇會有人爆粗:「會講好粗嘅說話,佐就唔係我,係我嘅徒弟。(怕唔怕觀眾會投訴?)投訴就另外一回事啦,自己都唔想拍啲咁傳統嘅劇,好多嘢都想試下,眼見ViuTV大膽去試咁多嘢,嘗試去做起碼都會娛樂到自己。」總括而言,邵仲衡話拍此劇簡直是大快人心。

同劇有尹揚明、劉錫賢等老戲骨。(胡彩藍Instagram)
尹揚明都好型下。(胡彩藍Instagram)