黎耀祥三屆視帝竟然冇劇開  無綫晒冷騷極速閃

撰文:林通賢
出版:更新:

黎耀祥基本上已是近年無綫劇集icon,代表性僅次於TVBuddy,每年在影視博覽,必定有兩三套劇上映,但今年一反常態,在影視博覽上,祥仔竟然一套劇集都沒有。昨日祥仔同無綫近百藝員一同出席,和黎諾懿、洪永城等為綜藝節目《嘆得好健康》站台,該節目亦類似無綫以往製作的旅遊節目,祥仔拍旅遊節目不奇怪,但奇怪在介紹完之後就匆匆離去,沒有留下接受記者訪問就走。

在這兩天的影視博覽,無綫多套劇集「晒冷」,所有小生花旦都有劇上,唯獨這位三屆視帝黎耀祥一套都冇?認真估唔到。不過祥仔就以WhatsApp回覆表示6月就會拍新劇,他說:「因為去年主力拍處境劇《八時入席》一直到年尾,之後到現在忙《風雲》舞台劇和那個《歎得好健康》,六月才會開始拍王心慰監製的新劇,所以今年才沒有劇在展覽會介紹,多謝關心!」祥仔的劇集一直有收視又有口碑,如果今年無劇上,真是替無綫擔心,祥仔6月先開工,最快都要下年年頭先有新劇播,他現忙為《風雲》舞台劇綵排,一個無祥仔嘅無綫,真係有點不習慣。

早幾年祥仔劇集是影視博覽焦點,但今年一套都冇。(網上圖片)
祥仔雖然今年冇拍無綫劇,但就演出《風雲5D》舞台劇,外出搵真銀。(微博圖片)
祥仔內地人氣勁,幾乎每星期都北上剪綵,仲好搵過拍無綫劇。(微博圖片)