《都市閒情》教C9收兵 搵博士分析兵法:娘娘一定有貪念!

撰文:林通賢
出版:更新:
《都市閒情》今日忽然請教授嚟講收兵為咗咩?令網友都嚇一跳。(網上截圖)

《都市閒情》令人最有印象應該是安德尊和李錦聯的「蝴蝶鴛鴦鏟」,其餘都是講師奶炒餸,最多搵醫師講婦女病,或者金融專家講吓股市,但今日《都市閒情》忽然貼地,在「諸事廣場」環節上竟然討論「收兵為咗咩?」4位主持安德尊、朱敏瀚、宋芝齡、姚嘉妮亦煞有介事地討論,還專程請了一名婚姻及家庭治療哲學博士屈偉豪到場,講解女人收兵心態,實事認真做,真係好富娛樂性。

博士外表就好博士,但分析有幾貼地和搞笑。(網上截圖)

屈偉豪博士大有來頭,是香港婚姻及家庭治療協會副主席,分析亦好貼地,他說:「娘娘有三樣嘢,第一要有實力,第二要有手段,足夠社交能力,同時處理咁多關係,咁多電話唔可以錯,第三是心態,有水兵畀錢,運輸兵車我,娘娘一定有貪念,但最重要是佢想俾人圍住,俾人崇拜…」真係好到肉。

講娘娘心態中啦,講兵仔心態博士都得,他說:「有首歌叫《犯賤》…第一兵仔有個奢望,娘娘真係好吸引,希望有日同娘娘一齊,第二佢冇自信囉,唔會覺得自己有素質,可以吸引人,可以同人建立一個好深入嘅關係,於是要靠畀服務、畀著數,咁咪做兵囉….」博士又好中point喎。

 

姚嘉妮今日在趣劇環節飾演娘娘,但現實中她從未收兵。(網上截圖)

至於今日兩位美女主持姚嘉妮、宋芝齡就希望網友可以繼續支持《都市閒情》,姚嘉妮接受《香港01》訪問時說:「《都市閒情》我覺得係想年輕化嘅,我哋其實啲內容都好啱後生仔睇,我哋有粉絲㗎?(妳有無收過兵?)我從來唔做呢樣嘢,我好反感女仔做呢啲,以前有人追,我如果冇feel,我會即刻落閘、叫佢唔駛浪費時間,我連佢電話都唔聽㗎,仲有男仔攞手袋都好核突,有男仔話車我,我都話自己識去,我呢啲咪賤命一條囉,唔識享受…哈哈!(妳老公林祖輝當年係咪兵?)梗係唔係啦!」

而宋芝齡就表示《都市閒情》不再是師奶節目,她說:「我哋班撰稿員好多後生仔,所以我哋啲題目貼地咗好多,有啲Terms我哋都唔識,嗰教授分析都啱㗎,收兵嘅人心態一係好缺乏愛或者係被寵慣。」