【不懂撒嬌的女人】任哥後生係巨胸Model 24年前已同林文龍合作
潮流興大叔控，只要你夠型，後生女一樣俾like，好像《不懂撒嬌的女人》劇中的袁文傑，身高188cm，oppa身型當然吸引絲打，除了他之外，劇中飾演任哥的55歲林偉，亦被盛讚keep得好，原來林偉後生是一名模特兒，還為《號外》拍過寫真，亦和黃德斌一齊參加過亞視舉辦的《香港超級模特兒大賽》，林偉接受《香港01》訪問時說:「拍寫真嗰陣23歲啦，嗰陣胸肌38寸、30寸腰，舉啞鈴，舉到120磅，10下一組㗎，依家唔得喇，太大舊着西裝唔好睇，而且都冇咁好力啦。」
林偉今次在劇中演CEO，經常受到田蜜（高海寧飾）誘惑，不過林偉表示現實中如果遇到田密這種女人，最好掉頭走，他說：「呢個世界冇免費午餐，呢啲女人咁有心計，食咗你都唔知，見到好掉頭走，一定冇好嘢。」不過林偉對自己的演出就不太滿意，他說：「我返嚟無綫後一直都係做壞人，監製話你唔係咁局限㗎，試下啦，佢俾好多信心我，其實我睇返自己覺得好差，俾我再做一次一定更好。」
林偉2012年經監製關永忠介紹回巢無綫，多演奸角、黑社會大哥，堪稱御用奸人，不過在93年《都市的童話》，林偉在劇中是第二男主角，第一男主角就是林文龍，現在二人在《不》劇再度合作，戲份有所不同，但林偉看得開，他說：「自己要放下身段，我覺得戲冇分㗎，係teamwork嚟，無論主角、配角、甚至臨時演員都要出力，咁套戲先好睇，自己細嗰陣年少無知，以為機會隨時有，唔識珍惜，拍完《都市的童話》就去咗台灣，點知當時興閩南話嘅劇集，結果就發展麻麻。2012年監製關永忠介紹返嚟，我記得4月16日簽約，17日就即刻為《雷霆掃毒》開工。」
林偉身高178cm，加上當過模特兒，不少人都以為他是花心男，但他表示自己一啲都唔花心，他說：「我絕對唔係囉，後生嗰陣就…..唔好提喇，（有冇男仔追過你？）有啲話對我有好感囉，我會同佢哋講我鍾意女仔，唔好意思…哈哈，（咁女仔追你呢？）依家冇啦，就算有同佢哋講我搭巴士喎，你點會同我迫呀？（女仔話唔介意呢？）咁我話我介意囉，我有女朋友喇。」所以話外表不是一切，靚佬不一定是花心的。