【ViuTV詭探】50後老拍檔重聚 尹揚明車保羅自信一take過唔使OT

撰文:施玲玲
出版:更新:
《詭探》唔止有車保羅出山,連Mr. 樂隊成員MJ都有份客串演出。
身形有點發福的尹揚明,最近又拍劇又拍戲,非常忙碌。

無綫雖然以《不懂撒嬌的女人》洗版數星期,但今晚的黃金時段將會是場罕見的硬仗,因為接檔的出土舊劇《蘭花劫》將要迎戰ViuTV的懸疑靈異劇《詭探》,前者有視后田蕊妮,但就要適應由4K畫質變「人工」16:9畫面;後者主打香港都市傳說,話題性十足,睇邊個台都好,觀眾起碼叫有得揀。

《詭探》以驚慄題材作招徠,也邀得不少久未露面的演員演出,當中車保羅和尹揚明更是識於微時,「未入行已經識㗎喇,以前拍嘢都未試過同場做戲。」尹揚明指二人不止是舊識,也同樣大膽,日前到紙扎舖取景時更豪言見慣,「細細個都已經上香拜神,不過原來而家啲祭品咁先進,電話、跑車都紮到,真係要乜有乜!」工作不斷的尹揚明又透露要遷就檔期才能順利拍攝,近來又接拍電影,所以比較忙,「而且我一向都好少捱夜拍攝,拍《詭探》一定會通宵,第二日仲要接電影嘅中班!」聽見都辛苦。

「偽文青女神」楊偲泳(Renci )和趙碩之兩位女角,都有一齊為《詭探》開工。
車保羅和尹揚明雖然久別幕前,不過二人都透露最近工作邀請有所增加。

十多年未再拍港劇的「高人」車保羅近日因為《詭探》而受到注意,但他不諱言很多接洽的工作都是「冇米粥」,「不過冇所謂,反正我都有份正職,要幫手咪盡量合作!」他補充雖然幫到生活,可是因為市道不景氣,也不會要求加片酬,「你話我值幾多咪幾多錢囉!」車保羅又謂最近趕拍劇,家人投訴也沒有辦法,最緊要有俾家用,「湊孫嘛,你要靚衫我咪俾件靚衫你,但都要爺爺搵到(錢)先得㗎!我仲欠老婆粒鑽石都未買!」提到跟舊識尹揚明合作,車保羅笑言難得過足戲癮,又表示有信心與對方一take過提早收工,不必OT。