麥明詩瘋狂撞樣忽然似唐寧 十優萬能Key：叨下佢哋光啫！
撰文：郭敏玲
出版：更新：
早兩日麥明詩自貼同唐寧的對比照，似唔似樣先？（麥明詩Instagram）
地球上有6、70億人，人有相似真的是不足為奇，周不時會見到邊個同邊個撞樣，誰人就是某某的翻版，簡直眼花暸亂！但如果瘋狂同人撞樣，是否代表大眾樣呢？同靚女撞樣呢？又是甚麼感覺？相信麥明詩身同感受。事關她早前被指同麥美恩撞樣撞到正一正之外，早兩日她再來一個自抽，將自己與人妻唐寧照片拼貼在一起，說：「啱啱參選嗰時，有啲人話我同唐寧似樣㗎 #蘭花劫 #我又要逆齡」驟眼一望，兩人的眼神與笑容又真係有幾分相似。
其實麥明詩撞樣，又點止得麥美恩同唐寧呀？作為新一代萬能key，總有幾個排住隊同Louisa撞樣。好似2015年，她參選國際中華小姐時，身為3號佳麗，竟然來自南京的4號佳麗巫雪菲撞樣，兩人站在一起，十足十一對孖生姊妹，差在未相認！萬能key仲未完㗎，話說麥明詩剛剛參選時，就被傳媒話似楊采妮，亦有網民話似楊秀惠！大家聽完會唔會覺得「媽呀，我好亂呀！」先？唔緊要嘅，十優港姐都係得一個啫，冇事嘅。
問到麥明詩點睇自己係新一代萬能key呢？佢就話：「唐寧佢哋都係靚女，只要五官端正，影相嘅時候就扮下佢哋啲神情，咁就有7份似㗎啦。」講就易，但最重要嘅係首先要有樣，麥明詩似親都係靚女，都證明佢有一定顏值喇，不過Louisa非常之謙虛話：「咁咪可以借啲意叨下佢哋光啫！」至於問到咁多個靚女，麥明詩覺得自己最似邊個先？佢就好巧妙地答：「我鍾意唐寧呀。」咁又係，做咗人妻都好似冇生過BB咁，係人都想變成佢！
+5
麥氏姊妹花。（麥明詩Instagram）