【學是學非】事非精劉穎鏇同男友感情淡：始終香港同美國太遠喇！
應屆港姐軍亞劉穎鏇(Tiffany)，參選的時間已經憑傲人的身材吸引不少人的目光，現在加入《學是學非》做主持，更加多人在網上談論她。近日她在自己的Instagram上傳了一段在中圈投籃而且命中的片段，瀏覽人數接近90萬。其實Tiffany在美國讀書時都參加過不少女子籃球賽，在接受《香港01》訪問時都透露回港後仍然會打波，有時間就會跟朋友一起打波，還會跟TVB藝員一齊打，而且佢知道TVB自己有隊球隊，仲話好有興趣加入添！
Tiffany在美國出生，雖然父母都是香港人，不過家人大多已移民美國，所以她一直都在美國生活，現任男朋友都身在美國。問到她相隔兩地如何維持感情，她說：「我之前都講過喇，順其自然，工作為主。我地都keep住有聯絡嘅，但溝通都係難嘅，都有少少淡咗。始終我喺香港佢喺美國，太遠喇。所以我都有同男朋友講話我有我做嘢，你有你讀書，大家順其自然，睇吓之後點喇。（會唔會諗住分手呀？）呢啲就好講嘅，而家都好似keep住係朋友咁，保持溝通，到時如果可以咪繼續，如果唔可以都要面對。其實我都慢慢適應緊呢行，感情都係唔諗住喇。」
聽落這段感情都真的有點兒暗湧，談到理想男朋友的條件，因為Tiffany本身都有176cm的高度，會不會將男方的高度列為重點考慮因素呢？她說：「好高又唔需要嘅，可能我都慣咗咗啲男仔同我平頭或者高我少少，所以希望至少都平頭喇，不過當然我唔會話因為矮過我就唔好。我覺得搵男朋友都係睇性格或者相處好唔好，我都希望佢係運動型。而家個男朋友都高我少少，不過就無袁文傑咁高，（袁文傑身型係咪完美？）或者係電視入面睇係，因為佢一拍埋女仔度就會有個差距喺度。其實外表始終都唔係最緊要，性格呀，人品呀都好重要，如果係運動型就會加分。」熱愛打籃球的她自己都會希望男朋友能夠一起分享快樂，不過她指即使男友不會打籃球，自己也可以教他，這些就是情趣吧。
雖然一直都身處美國，不過Tiffany都能夠講得一口流利的中文，而且還在努力惡補中，她表示：「我會學中文呀，我得小學程度架渣，我都專登買咗本講中文嘅書，由基礎學起，希望可以幫助到之後睇劇本喇。」毅然掉低在美國加州大學的學位，可能在很多人眼中都是一種任性的行為，不過Tiffany家人對她十分支持：「屋企人都好支持我入娛樂圈，因為佢地都好想我返嚟香港，因為佢地本身都係香港人，如果我自己覺得對呢一行有興奮就去做喇，不過唯一嘅條件就係一定要讀書，一定要有返個degree，不過就唔介意花多幾年時間讀。其實我暑假都報咗啲網上課程係讀埋美國嗰邊啲credit，或者都會喺香港報返個課程。」
在《學是學非》中，Tiffany、張寶兒和馮盈盈取代了舊一輯的黃心穎、李佳芯和張秀文，新登場會唔會擔心同其他師姐唔夾呢？Tiffany表示完全無這個問題：「呢個節目好好玩，因為我本身都好活潑好貪玩，同埋我都好鍾意科學嘢，所以呢個節目可以一路玩一路學，都幾開心。同埋我地自己成班女仔一齊玩又係好開心，（你最細喎，會唔會俾人蝦？）咁俾人蝦就一定嘅，不過有一半都係為咗節目效果，真人我地就好少咁串嚟串去。其實我地私底吓都好多嘢講，當初我入節目組嗰陣都擔心會唔會相處唔到，而且佢地都已經咁有經驗，不過第一日拍完我已經覺得佢地好好人，同埋好樂意教我地嘢。」能夠咁快融入這個圈子，感情事都係放埋一邊，專心事業好過，話晒Tiffany都只係得20歲，來日方長喇！