【足球】小C朗拿度踢祖記U9超晒班　虎父無犬子又入靚波

C朗拿度轉投意甲班霸祖雲達斯，終於在今周對薩斯索羅一仗開齋，助球隊以2：1贏波。所謂虎父無犬子，另一邊廂小C朗隨父加入祖記後，於U9賽事入球停不了，絕對是「超班」。

C朗今夏以1億歐元，由皇家馬德里轉投祖雲達斯，8歲大仔亦加盟祖記青訓，「老婦人」可謂以1億收購兩個C朗。

不過，小C朗算是搶盡爸爸鋒頭，首戰為祖記U9上陣就入4球；周日又接應隊友傳送，於禁區邊左路大位起右腳建功，入波後瀟洒地撥一撥頭髮。C朗女友Georgina拍片放上網，網民都指虎父無犬子。

C朗3場半後終開齋

反觀爸爸C朗在意甲首3戰都未能取得入球，直至今周主場對薩斯索羅一役，50分鐘一次角球乘對手解圍失誤，近門「執雞」才結束320分鐘的等待。

這名葡萄牙球星在15分鐘後再入一球，位置與小C朗的入球相近，不過他就用左腳射遠柱。C朗梅開二度，助祖雲達斯以2：1力克薩軍，保持全勝以12分位列榜首。