【不懂撒嬌的女人】「呢個世界公平咩」 編審向《創世紀》致敬
《不懂撒嬌的女人》進入最後一周，本周日（28日）大結局，Mall姐、Gordon、Saving、Cherry等能否重建事業是主線之一。昨晚（21日）上演一幕Saving大數傲星集團商場管理公司老闆游生的處事手法，網民發現有不少《創世紀》的影子。
劇情講述Cherry（唐詩詠飾演）打算重返傲星工作，並叫Saving（王浩信飾演）一同去。不過，面試者卻是賤Han，Saving出手打賤Han，Annie（譚凱琪飾）、游生（袁文傑飾演）闖入會議室勸阻，Saving指游生才是始作俑者，連珠炮發大罵他。
想睇更多內容，可Click入以下圖片：
Saving的該段對白，與1999年無線電視劇《創世紀》陳錦鴻飾演的許文彪的一段著名對白甚為相似、動作及場景更是如出一轍。只是所指的對象由樓市炒家變為無良老闆。引起連登網民紛紛將兩劇比較，有網民留言：
十年前同十年後社會既需求都一樣
反而呢d說話，tvb唔敢講好耐
所有年代都係咁
1999年播放的《創世紀》講述香港從1990年到2010年的20年歷史變化。其中一幕，由陳錦鴻飾演的許文彪，聲嘶力竭大罵香港畸型樓價及地產商，諷刺社會不公義，成為網民至愛，並且不時將他的金句套用現今社會。
Saving 語錄：
我唔係冇食過（屎），我安份守己，日搏夜搏，
我賺得嗰一萬幾千，我唔係冇食過，但係呢班人呢？
你識商場，識咩係管理咩？淨係識攞少少錢，攞少少時間出嚟
炒呢樣（個），升嗰樣（個），
跟住就喺度巴之閉，咁叫公平咩？
你出去是但問個人，求其搵一個嚟問，問佢地想要乜？
佢哋只會答你，佢想要份安安定定嘅工，
點解佢要用成世人嘅時間，去搵份咁嘅安安定定嘅工呀？
因為有你呢ｄ咁嘅有錢佬喺度玩野呀，
越有錢越有得玩，
呢個世界公平咩？呢個世界公平咩？
等我教你做老細，
做老細係要負社會責任，要照顧員工，
同埋要令呢個世界有少少唔一樣呀！
編劇朱鏡祺：向《創世紀》致敬 感謝觀眾支持
《不懂撒嬌的女人》編劇之一朱鏡祺接受《香港01》訪問時直認該幕是刻意向《創世紀》致敬。他表示《創世紀》許文彪大罵香港畸形樓市的一幕戲，十多年來在觀眾間心裡留下深刻記憶，「證明佢歷久常新，好貼切」、「兩套劇其實有相似之處，香港後生仔女，係有難以解決嘅問題。例如劇中Saving想做老闆嘗試改變世界，有理想但冇資本做唔到返去打工。」並稱劇本由心入手，望寫出貼地寫實的劇情，為打工仔吐出心聲。
朱鏡祺又感謝觀眾支持「大半年前拍緊時，估唔到潮到呢個程度。好開心」，又表示袁文傑因飾演「游生」登上《100毛》此類以年輕讀者為主的媒體封面，證明所塑造的人物令年輕人有所共鳴，「希望喺後生仔心入面建立一啲嘢，再發酵出去。」並希望本港影視創作能繼續抓住年輕人的心。「事實上太多選擇，又美劇、韓劇......大台有好多好嘅演員同幕後人員，希望可以攞返年輕觀眾返嚟。」
後半段王浩信演出將有驚喜
朱鏡祺亦在訪問中透露，Saving怒斥游生一幕仍未完結「下半段會有好大驚喜，王浩信發揮會令觀眾拍晒手掌。」預告劇情
會有令人驚喜但合理的轉折。想知接下來如何收科，還請觀眾留意今晚《不懂撒嬌的女人》。