麥貝夷靠內地節目翻身 玩直播吸金5位數:我31歲都想賺多啲錢!

撰文:史順宜
出版:更新:

「你我情如路半經過,深知道再愛痛苦必多…」聽完呢兩句相信大家都會記得係來自張智霖(Chilam)及許秋怡嘅經典合唱歌《現代愛情故事》,但大家又記唔記得幾個星期前,香港歌手麥貝夷因為參加湖南衛視音樂節目《我想和你唱2》唱過呢首歌而獲得唔少網民賞識呢?

【我想和你唱】麥貝夷「被安排」變素人:節目組唔畀提我係歌手!

傳送門:http://bit.ly/2upoydt

近年香港有歌手陳偉霆到內地發展,由「而我不知道陳偉霆是誰」,到「人人都知陳偉霆是誰」。其實內地市場之大,對於香港artist來講,真係可以為佢哋帶來「翻身」嘅機會。好似香港歌手麥貝夷,之前如果唔係上過《我想和你唱2》,可能更加無人知佢係一個歌手。上完內地節目後嘅佢,果然大有不同,以往麥貝夷在內地直播平台開網上直播最多只有幾萬人收看,但自《我想和你唱2》播出後,直播收看人數由幾萬升至幾十萬,足足多了一個零。而且直播所收得嘅「送禮」由3位數上升至接近5位數。

自從《我想和你唱2》播出後,麥貝夷的直播收看人數由幾萬升至幾十萬。 (網絡截圖)
突然多咗咁多粉絲,唔知Karene會唔會繼續喺內地搵吓人仔呢? (網絡截圖)

歌手麥貝夷接受《香港01》電話訪問時直認上完內地節目,為31歲嘅佢帶嚟新希望:「我上節目前,真係諗過因為收入問題而唔再做娛樂圈,打過另一份工。屋企人年紀大想退休,屋企得我同家姐兩個女,唔可以要家姐一個撐住頭家,我好擔心日後如果屋企人有咩頭暈身㷫會負擔唔起,不過最近上完《我想和你唱2》之後,真係唔同咗,為我帶嚟曙光,工作量多咗,雖然唔係搵得多,但起碼有一個穩定嘅收入。」

+2

「上完《我想和你唱2》之後,我個世界真係好唔同。以前直播最近只係有6萬人睇,依家升至近90萬,而且直播所收得嘅「送禮」由520個金幣累積至9500個金幣,雖然直播平台嘅金幣唔係同人民幣1對1計算,但係總好過520個金幣。(怕唔怕俾人話你鍾意搵人民幣?)人民幣都只係一種貨幣,我已經31歲人都想賺多啲錢,減少屋企人負擔。」麥貝夷笑然。

直播賺嘅金幣多咗,總算可以幫補下生活。(網絡截圖)

麥貝夷除左微博或內地平台粉絲人數直線上升,香港嘅工作亦有所增多:「其實我好多謝一班嘅網友支持,節目出街後,喺Facebook有好多人肯去share條片,當時個Facebook真係洗咗版,令到我可以喺香港多人識咗,工作自然多咗。最近就多咗活動嘅邀請,同埋都有接唱歌嘅job,有時又會收到一啲KOL形式嘅工作,出一個product post就有收入,而內地方面,依家有一部網絡電影接洽緊。」

麥貝夷唱功,其實幾好聽。

捱到31歲終於有人認識嘅麥貝夷,雖然賺錢唔多,但佢似乎已經好感恩:「以前好多香港人唔識我個名,唔知我係一個歌手,最多只會講我係唱《勾手指尾》嗰個女仔,依家真係好唔同,喺香港會有人叫得出我個名,喺內地因為我上節目嘅時候著咗條紅色嘅連身裙,所以網友會叫我做紅衣姐姐或者係小麥姐,雖然有唔同嘅花名,但係只要大家記得我,我已經好滿足。」