陳慧嫻相隔9年再度踏上紅館，舉行《The Fabulous 40 Priscilla LIVE IN HONG KONG陳慧嫻演唱會》，目前完成了五場，尚餘年初二尾場。慧嫻在第五場完騷後接受訪問，認為一場比一場好，更透露自己揀唱《去吧》，因為昨晚（26日）是龍年最後一場，寓意：「新嘅一年，本身諗住，龍年去吧，今年有咩唔開心，就去吧，開心迎接蛇年來臨。」雖然有得小休幾日，不過慧嫻就表示自己主要都是養聲，並留在家裡封利是，預備尾場派6位數利是畀台前幕後工作人員。

講到較早場數發生小意外，頭場身穿深藍色公主裙時跌倒，她指第二場已立即加上手抽，安全很多。慧嫻又表示：「今次啲衫都好重，啲布好厚下，又要著好高嘅platform鞋，第一次演唱會著咁高嘅鞋，啲衫又重，要用力啲，行得小心啲。我唔知自己行路有啲奇怪，所以好開放咁去行，但係一下就跌咗响度。（踩到條裙？）佢冇得抽起，原來我踩咗落塊布，另一隻腳再去就跌。」她當時也不以為然，後來才發現膝頭哥跌瘀了，笑稱自己向來不了解自己身體，幸好不是太痛，「嗰下我又好彩識得跪下，唔知係咪平時有郁開，冇咁傷。」

至於另一場甩打底褲，慧嫻就說：「因為我『休』得唔夠高，佢哋話我瘦咗啲，所以彈吓彈吓嘅時候就彈咗落嚟，大家著過褲都知，條底褲跌咗一半落嚟，行都行唔到。我又冇乜儀態，咪當場『休』返佢，反射性反應。」她更笑言第二場已即刻換過條細Size的打底褲：「我唔怕走光呀，『休』高啲。」

第五場邀請ERROR做嘉賓，有部份內地觀眾不滿，慧嫻就解釋自己與ERROR結緣，因為四子新歌找了她來客串，自己認識了年青的新朋友，覺得很開心，也希望被更多年青朋友認識到，於是邀請她們。在演唱會上，她說自己跟肥仔身高最接近，所以只會跟他說話，問到與哪位ERROR成員最熟稔，慧嫻說：「肥仔最識氹人講嘢，同埋佢教跳舞，又叫我跟佢跳舞，所以肥仔最多講嘢。」

至於在演唱會播出的片段上，慧嫻剖白內心世界，講到眼濕濕，她透露都是按導演要求發揮，但每句都是真心話。被問會否想搵男朋友，她說：「我講咗㗎喇，我唔需要，去到呢個年紀唔會強求，有咁多歌迷陪住已經好足夠，亦有好多朋友。但如果命運安排突然有一個人出現，又覺得好舒服，當然唔會抗拒。」

按圖睇更多陳慧嫻演唱會靚相：