【流行經典50年】張崇德原來唔想做歌手：其實我鍾意做戲多過唱歌
撰文：許栢倫
出版：更新：
攝影：黃國立
商天娥與張崇德即將合演大型音樂劇《馬丁路德》。
《流行經典50年》唱極都仲有，樂迷一向知道張崇德是唱得之人，怎料今次他罕有地沒有與哥哥張崇基同台演出，反與商天娥一同壓軸登場，合唱張國榮陳潔靈的《只怕不再遇上》，原來娥姐不但曉演戲，因為訓練班時學唱歌練好唱功，多年來被不少唱片公司力邀加盟，不過她都一一拒絕，她坦言：「其實我好被動，我唔做主動果個，我對唱歌有信心，但又唔係好大，我驚市場依家都...我都唔知呀！有人敲門，我唔係高要求，但我有要求，變咗...再等下啦，我都唔知幾時安排啱時機！」
娥姐的信心，原來係慢慢累積過來：「我最初信心唔大，後來被身邊好友指導，越唱越有信心，信心強咗，咪唱多啲囉，初初唱幾句，之後變一首，慢慢加上去。其實我由細到大都鍾意聽歌，英文國語廣東歌，連粵劇我都聽，純音樂我都聽，就咁跳舞冇對白劇我都會睇，仲會睇到我四行眼淚！」
以表情呈現「喜﹑怒﹑哀﹑樂」，你又睇唔睇得出佢係做緊邊一種？
+7
張崇德：我鍾意做戲多啲！
張崇德大學時期副修聲樂，畢業後參加歌唱比賽奪冠，憑著獨特的「二重唱」打響名堂。原來唱歌只係其中之一，最愛的係電影，他坦言：「其實我鍾意演戲多過唱歌，唱歌係一個興趣，幸運贏咗比賽踏入呢個行業，咁多年來，唱歌只係其中一個身份。」他續道：「我鍾意電影的地步係，明星足球隊踢波時，同曾志偉講，我想認識電影多啲，佢話跟佢做電影副導演，最辛苦職位係副導演，但我都去做，做完我好欣賞電影工作者，原來咁難做。就算我寫書創作，我都一定要睇住部電影，咁先能夠刺激我做事快啲，電影係無可取替。」
事實上，張崇德在電影上的成績遠不及唱歌，唱歌幾乎成為他的主要收入來源，他說：「冇人知我鍾意做戲，別人想起我都是唱歌，唱歌已經好慣常，但拍嘢係好有新鮮感！我係一個唔悶得嘅人，唔鍾意重覆做，例如出Hi-Fi碟，如果每年只唱一首新歌，冇新元素，我寧願停落黎，我自己鍾意舞台演戲音樂，唔係只愛做一個歌手！」