【任噏樂評】《流行經典50年》定《勁歌金曲》?　其實大家睇緊乜

日前TVB播出的《流行經典50年》比起過往18集，內容算是相當別開生面，邀請了難得在TVB露面的容祖兒亮相，還要一口氣唱足8首歌，天后規格的確不同凡響。容祖兒上TVB節目唱足咁多首大熱作品，觀眾及樂迷固然睇得開心，不過抽離返少少，除咗容祖兒，我尋晚到底仲睇咗啲咩？

《流行經典50年》自未改名仍然叫《流行經典50強》開始，賣點都係一班好耐無喺樂壇出現嘅歌手。最初喺節目當中見返黃翊、張立基、黎瑞恩、劉錫明呢一班80、90年代嘅歌手，嗰種驚喜都咪話唔震撼。當然，為咗支持吓新一代歌手，每集嘅《流行經典》都會搵一兩個年青歌手上去翻唱經典作品，順便幫歌手做吓宣傳都係無可厚非。不過自從節目改名做《流行經典50年》之後，我覺得佢反而愈嚟愈似《勁歌金曲》。就好似尋晚咁，焦點當然喺容祖兒身上，順手仲幫祖兒慶祝入行18周年，呢個包裝的確唔錯，但大家唔好唔記得，呢個節目明明叫《流行經典50年》，因乜解究除咗祖兒之外，就只有區海倫、許靖韻同陳明憙？後兩者點計都說不上「流行經典」啦？如果要幫祖兒慶祝，又點解唔擺去另一個長壽音樂節目《勁歌金曲》，又或者索性做一個《容祖兒入行18周年慶祝特輯》？

經過早幾星期嘅節目後，你可能會發現，現時《流行經典50年》每集邀請的經典歌手和新世代歌手愈來愈傾向「五五波」，而且嘉賓的名單亦開始重復又重復，就以上星期陳曉東、王馨平為例，其實都上過節目幾次，陳曉東之前喺4月同5月已經上過節目，而王馨平喺7月上過一次、上星期又上一次、嚟緊下星期節目又再亮相，可見其實嘉賓名單已經開始「冇貨」，唯有不停打友情牌兼靠年青歌手頂住。不過《流行經典》要做埋《勁歌金曲》嗰份都可以理解嘅，因為《流行經典50年》自首播已來，收視好就不在話下，連網上嘅傳播度都相當高，成為唔少網民嘅討論焦點，講真一句，你係節目組同TVB嘅話，又點會捨得比呢個節目草草完結？梗係繼續煲盡佢啦！

相反睇睇另一邊廂嘅《勁歌金曲》，首先問大家一個問題，你記唔記得《勁歌金曲》而家係星期幾同幾點做？深信唔少觀眾都要特登上TVB.com先知原來係星期六嘅下午3點55分播映，仲要係只得5分鐘嘅濃縮版，只提《勁歌金榜》十大位置，要睇完整版？麻煩去隔籬J2收睇。老實講，其實而家《勁歌金曲》做緊啲乜，我諗都應該唔係太多人知，睇返過去幾集節目嘅嘉賓陣容，小肥、王浩信、鍾舒漫、Michael Learns To Rock，諗諗下都幾熟口面，原來最近都係喺《流行經典50年》亮相，難得請到歌手嚟一廠獻唱當然就要用盡佢啦！呢個做法都說得上係「一雞兩味」嘅極致。

講開又講，《流行經典50年》原來都只係剩返3集，而《勁歌金曲》除咗每年大家仲會笑下個頒獎典禮外都應該無乜人會留意，反而就似乎永遠都唔會有完結一日，雖然《勁歌金曲》都說得上係唔少人嘅童年回憶，但係除咗賣個名之外，《勁歌金曲》到底仲有咩賣點？既然《流行經典》咁多人討論，而且仲可以擺黃金檔期，不如《勁歌金曲》索性接埋佢，同《流行經典》合併做《流行勁歌金曲50年》啦！