【任噏樂評】ToNick變第二隊Dear Jane？　情歌夠入屋先有運行

樂隊ToNick唔經唔覺喺香港樂壇已活躍了近10年，早期歌曲以Pop Punk風格唱出熱血、追夢，十足後生仔夠火一味衝。ToNick作品以廣東話口語入詞，甚至會加入俚語、粗口，得閒又會抽時事水，夠晒親民貼地。而且主音恆仔唱Live經常與觀眾互動，炒熱氣氛冇難度，再配合ToNick本身歌曲旋律夠易記琅琅上口，喺大場開show千人大合唱不是夢。因此ToNick深受年輕樂迷歡迎，因為鍾意佢哋「咩都夠膽死」。

ToNick係本地Band Show常客，因為有佢哋氣氛一定好，差唔多每次喺蒲吧開show都令觀眾跳到成身汗，大嗌「開大啲個冷氣呀！」睇得ToNick點只跳咁簡單，「插水」（Stage Dive）係指定動作，2011年喺九展開《發你個音樂祭》有fans Cosplay動漫人物上台插水，台上台下都玩到癲，仲要有片為證，齋睇片你都覺得High，睇Show係咁先對路㗎嘛！

ToNick愈嚟愈多發展，除咗夾Band出Show又做埋節目主持，主音恆仔更執導電影《救殭清道夫》，ToNick包辦埋電影主題曲《長相廝守》。《長相廝守》一改以往風格，由以往有火的熱血青年變成情歌王子，而編曲也有點五月天的感覺，加入弦樂讓人有感動到起雞皮的感覺。《長相廝守》易入口，又有電影加持，所以成績非常好，喺YouTube至今有過5百萬點擊，又成為兩台冠軍歌，可以話係ToNick第一次咁好成績。

作為樂迷見到ToNick愈嚟愈入屋當然開心啦，不過我想聽番以前嘅ToNick多啲。

唔知係咪因為《長相廝守》成績好所以食住條水，新歌《回憶備份》、《阿飛與阿基》都係行柔情路線，有啲似爸爸說教mode循循善誘，教大家要珍惜，活在當下行好人生每一步。寫感動、勵志、正能量作品其實冇問題，唔通下下都悲天憫人、憤世嫉俗咩？不過太多修飾，每樣嘢都編到咁靚，略嫌有啲「唔夠Real」。感覺就似Dear Jane由以前唱《男兒當打交》變成依家唱《不許你注定一人》一樣，其實啲歌係好聽㗎，不過硬係唔係好啱數咁。

網民對於ToNick風格轉變都話：「講真，要靠啲MK歌先Hit，陰功」、「ToNick靠呢首先紅到真係幾可悲」、「證明個市場幾變態」、「感覺上ToNick已經變咗質，都幾失望」等等。

新歌《回憶備份》MV都有網民留言：「比較喜歡從前風格，別迎合聽眾口味，做回自己，這首歌太沒你們風格」、「我比較喜歡以前嘅ToNick」。

樂隊轉風格然後一班老fans出嚟指指點點話「變到Pop晒」，「唱情歌做乜嘢？」係老是常出現嘅情況，但係不無道理。當初班fans就係因為樂隊嘅第一印象吸引到佢，俾到主流以外嘅聲音佢聽，題材能夠脫離流行曲套路講一啲貼地嘅嘢，先係可貴嘅地方。相反，為咗入屋改變風格，的確可以吸納到新嘅聽眾，但一直追隨嘅fans難免會反感，因為要聽大路嘢打開電視撳去TVB就大把有得聽啦，點解要走去聽Band，仲要俾人話「扮小眾、扮有品味」先？

雖然話人有好多面向，經歷多咗心態會有唔同，寫出嚟嘅歌自然都唔同；但昔日唱過「我窮我有風格 我唔做跟班鴨」，今日都變成跟住市場走，感覺上好似俾人呃咗10年咁。