《超級巨聲》林志程落選後成碩士生　上內地節目做素人繼續唱歌

TVB歌唱比賽節目《超級巨聲》在八年前首播，打造出不少現今香港樂壇的一線歌手，如吳業坤、許廷鏗等。不過有人歡喜自然有人愁，就像曾志偉在《無間道》當中一句：「一將功成萬骨枯。」一個成功的歌手背後，還有很多失落於比賽的淘汰者，他們未必是實力不足。不過人生嘛，除了實力以外，還講求一點機遇與運氣。就像當年《超級巨聲》第一屆的選手林志程(Jam)，可能大家對他的印象未必很深，在《超級巨聲》比賽後，間中會出現在《星光熠熠耀保良》等TVB大騷的表演上。雖然他在大台的亮相機會慢慢減少，不過卻沒磨蝕他對唱歌的熱誠，近年更積極在不同的內地節目中以素人身份登場，27歲，總算開始步向他想要的生活。

09年參加《超級巨聲》，當時仍在修讀中七等放榜的Jam沒有想太多，只是一心認為唱好歌，自然會有人欣賞。他欲言又止的透露：「完咗《超級巨聲》，都係主要接返同巨星幫有關嘅工作，最深刻嗰次就係巨星幫嘅紅館Show。其實我喺TVB大概都係一兩年時間有嘢做，可能自己當時身型比較肥胖，去拍戲又唔係，加上自己只是單純喜歡唱歌，所以根本沒什麼個人的發展機會。」後來他繼續在大學修讀翻譯，更到美國交流了九個月，回港後，他發現原來已經沒有人再找他在TVB工作。他坦言：「其實我覺得即使我當時沒有去讀書、交流，結果也會一樣。在《超級巨聲》的紅館騷前，樂小姐有搵過我傾，她說如果簽了TVB的合約會有較多機會，結果一簽便是五年，不過每年就是在慈善騷上出現一下，沒有人找過我嘗試其他發展。」

但林志程在年輕人中，算是較為「識諗」，電視行業發展不順，想唱歌又未夠其他同期觸目，於是讀完翻譯學士學位，便繼續Part Time修讀碩士學位：「嗰段時間我半工讀，一邊幫人補習英文，一邊幫人唱吓酒吧騷，做保險都試過，起碼有條命脈比自己追夢。當時我一直有寫歌錄歌，一個Musician應該做嘅嘢我都有做，但事實上係難嘅，唯有寄望有機會畀我爆出嚟，而家唔得咪做住其他嘢先。教英文係退而求其次嘅，因為我知道我唔唱歌嘅話，最鐘意就係教書。而家香港周街都係讀Degree出身，我梗係要讀返個碩士去提升自己競爭力。」

不過命運有時就愛作弄人，正當林志程已全身投入教書工作時，上天又突然為他開啟了一扇門：「今年五、六月嘅時候學校考晒試等派卷，嗰段時間我比較空閒，突然間我收到一個內地節目導師組嘅微信邀請我去試音，可能嗰段時間佢哋比較等人用，就叫我試下上去《我想和你唱2》同林子祥合唱《男兒當自強》，試咗幾次音，分別喺香港、深圳、長沙試音，最後好順利得咗，就係我第一次正式上去內地節目。」

林志程亦補充，想上內地節目也不是這樣容易的事情，某程度上也需要一些人事關係：「其實早幾年，我一路都有認識到內地節目組嘅人，交換咗微信之後，每隔一兩個月我都會寄啲Demo比佢哋聽，其實幾年都無特別嘅回音。但係佢哋好得意嘅，啲Demo比完一個導演聽，彈返嚟話唔得，啲節目組嘅人又會比另一個導演聽，《我想和你唱》嗰次去到第三個導演度，就終於成功咗！」

自從在《我想和你唱2》跟林子祥同台，雖然沒有為林志程帶來大量粉絲，不過的確也增加了他的工作機會：「最近上咗央視嘅《黃金100秒》，個副導就正正係睇咗《我想和你唱2》，就覺得我都幾好，又有啲故事，所以就搵咗我。而我比較幸運嘅係，因為《黃金100秒》的確係有好多素人要通過海選，過五關斬六將先可以上節目，不過我就因為識到節目組嘅人，所以冇特別去試音就上咗節目。」

外界可能以為，到內地上節目，為的都是掘金賺錢，更會以為這類選秀節目的「素人」應該好好搵。林志程卻坦言：「其實做呢啲節目演出係冇錢收。佢只會令你唔好蝕錢，包你機票住宿，等你唔洗餓住個肚去追夢，亦會好似《喜劇之王》個霞姨咁派返個飯盒比你。湖南衛視就好啲，因為節目綵排連錄影都要五日，所以會有少少錢比返我哋，當係補償我哋嗰幾日冇得接Job。不過我賺錢最主要嘅來源都係靠自己教英文同幫人唱騷。」雖然音樂夢發了九年也說不上順利，不過Jam仍然希望自己有朝一日能夠出唱片正式做歌手：「我希望將來有機會出唱片的話，入面嘅歌都會係我自己去寫。短期內亦希望襯住而家上咗幾個內地節目，可以為自己帶嚟少少知名度，到有一日比行內人發掘出嚟，等我有多啲表演機會。」