【叱咤】靠大家集氣上紅館 Supper Moment:好似悟空出元氣彈咁

撰文:黃浩晉
出版:更新:

昨晚叱咤頒獎禮驚喜一浪接一浪,單單是開幕表演Supper Moment X 觸執毛 X謝霆鋒這個陣容已經夠屈機,仲要見到霆鋒再次攞起結他彈《活着ViVa》,「單線Solo」再現舞台,真係回憶返晒嚟!無論現場觀眾或是睇電視直播的樂迷,同樣隔住個mon都感受到嗰份熱血!

樂隊Supper Moment連掃3獎大豐收,不單再次奪得「組合金獎」,並且3度蟬聯「我最喜愛的組合」金獎,成績相當令人鼓舞,再次印證樂隊音樂是「文化」,而非「潮流」,夾Band都有出頭的一天。

樂隊Supper Moment於叱咤連掃3獎大豐收!(黃國立攝)

在慶功宴接受訪問時,Supper Moment一講起與謝霆鋒夾《活着VIVA》,頓時化身小fans一樣非常雀躍,而且結他手阿雞為「單線Solo」平反:「唔好再話單線Solo易彈,你要彈得準係超級難!」

阿達又話:「外國咪有千人夾《Smell Like Teen Spirit》嘅,我諗我哋呢個case《活着VIVA》呢首就係香港嘅《Smell Like Teen Spirit》!」

Sunny:「頭先喺台上面真係好激動!點會諗到謝霆鋒就係喺你隔籬,同你『1、2、3』一齊起歌彈嗰段guitar riff!就好似《國產零零漆》嗰套戲講『苦練十幾年嘅輕功水上飄,終於可以大派用場喇!』哈哈!」

Sunny話諗唔到謝霆鋒就喺自己身邊一齊彈《活着VIVA》嘅guitar riff!(黃國立攝)

如果眼利的樂迷都會留意到,阿雞與Mike都放下PRS及Gibson,換上Ibanez結他,與當年謝霆鋒所拿的結他同一個牌子,原來是他們刻意安排用來記念《活着VIVA》呢首歌,阿雞話:「我同阿Mike(觸執毛結他手)都夾好咗,記念番當年認識Ibanez結他就係因為謝霆鋒!」

阿雞更重申,唔好睇少「單線Solo」一啲都唔易彈:「我想重申一樣嘢!個單線Solo一啲都唔容易!你要彈得準140 bpm嘅16分(音符),兼且空弦同撳落去都要準係超級難!所以唔好再話呢個Solo易,一啲都唔易!」Sunny補充:「同埋呢個Solo真係編得好精彩,大家講到依家都仲記得真係好勁!」

阿雞話單線Solo一啲都唔易彈!(黃國立攝)
相信眼利嘅樂迷都留意到,阿雞同Mike特登用Ibanez結他襯番《活着VIVA》。(黃國立攝)
+1

另外,Supper Moment得獎時提到希望能夠進軍紅館,那現在進程如何?Sunny話:「都係申請緊,有好多嘢都未落實,因為頭先喺現場見到大家嘅能量好大,所以希望借大家嘅能量幫我哋集氣,希望可以成功爭取到呢個場地去做!」阿雞笑言:「好似悟空出元氣彈咁,要大家幫手集一集氣!哈哈!」

Supper Moment希望借大家能量去集氣,成功爭取到紅館開騷。(黃國立攝)

今年何謂香港樂隊重要的一年,大眾對樂隊愈來愈重視,那他們會否覺得頒獎應該分設「樂隊」與「組合」獎項?Sunny話:「呢個唔只係樂隊同組合,其實可以諗埋分類型,我自己隊樂隊鐵樹蘭都有出席頒獎禮,係玩重型音樂嘅,希望慢慢推演落去可以分埋類型嘅話,咁就係一個完整同埋健康嘅生態!」

Sunny表示希望往後頒獎禮不單止分開「樂隊」與「組合」,可以再增設不同類型獎項。(黃國立攝)

最後提到他們的「兄弟Band」ToNick今年同樣大豐收,Supper Moment亦同樣很感動:「因為我哋一齊經歷緊呢樣嘢,由幾個人嘅演出,到50、100、1000人,甚至今日一齊攞獎,係一個好大嘅推進!希望我哋引起嘅少少火花,可以令其他夾Band嘅人可以繼續行落去!」

樂隊ToNick成績驕人,同樣令人鼓舞!(陳順禎攝)