【任噏亂評】點解《叱咤》會個個讚？　賣集體回憶穩陣實冇死

噚日就完晒所有樂壇頒獎禮，喺呢個年代，要大家留意頒獎禮搞緊乜其實愈嚟愈難。2017年最有代表性嘅廣東話究竟有幾多？我諗大家心目中五隻手指都可能用唔著。變相要觀眾自動自覺去打開電視睇頒獎，節目內容同編排就變得好重要。叱咤903就做咗完美示範，成晚充滿住驚喜、差啲成功引出淚水，甚至諗起一直以嚟嘅悲哀。

商台向來建立嘅branding喺四台入面最突出。當TVB毫無懸念地星夢玩晒；新城仲係獎門人「打和」頒獎mode；港台就連頒咗獎都唔知嘅時候，903嘅專業十大算係比較有指標性。雖然有人會話：「咪有係班DJ鍾意播咩就播咩！」係就係咁講，但係今年嘅賽果見到有獨立樂隊抬頭，例如ToNick、Supper Moment等，又有實力但被忽略嘅歌手，有出道10年嘅陳柏宇，上年同我最喜愛歌曲獎擦身而過嘅方皓玟；而周柏豪嘅《天網》、胡鴻鈞連夜被吹奏都冇獎攞，其實DJ們，甚至係903整個媒體，以一個欣賞同尊重嘅角度，畀唔同類型嘅音樂人一個機會。Chef Le Mon出場真係好型吖，但身邊嘅Supper Moment同觸執毛又點會諗到有一日可以會上到903呢個台做開場表演，就算謝霆鋒點chok都好，佢哋都諗唔到獨立樂隊可以同當年嘅偶像派嚟一個crossover？當TVB仲停留緊搵班小花扮女團跳到甩Beat、玩freestyle玩到歌手黑人問號嘅時候，903呢啲先係真正嘅音樂交流，就算Chef Le Mon上嚟目的只係宣傳新歌，呢個表演已經產生咗良好嘅化學作用，係值得睇嘅Live。

903除咗branding好，仲好識捉觀眾嘅套路，喺噚晚就大賣回憶。仲記得謝霆鋒未見人先唱《玉蝴蝶》嗰陣，台下有人話：「點會咁勁請到謝霆鋒呀？」903就證明畀你睇，就係請咗吖！唔想你睇下囉！結果佢一出場，即刻起晒雞皮！就算Chef LeMon之前有幾mk，而家有幾chok、做廚神有幾膠都好，佢開口嗰一剎那即時有種莫名嘅感動，《活著viva》同《玉蝴蝶》即時上晒神檯，謝霆鋒變埋一代搖滾教父。雖然而家係00後嘅天下，但對於孩童時期、中學時期都有謝霆鋒嘅歌陪住成長，就會get到個共鳴位，係會令你失控地尖叫。

另外一part，就係陳奕迅crossover林海峰。阿Jan用聲音導航講足903嘅30年，嚟個時空穿越。Eason就以一個好clean好pure嘅look，唱出佢喺「叱咤」得獎第一首歌《我的快樂時代》。林海峰講嘅說話感人，確實過去好多人都係有廣東歌陪住長大，係一種寄托、依賴，甚至係治療。Eason唱出自己一系列嘅經典歌，佢都話而家唱唔到咁高音，加上長期食煙令到把聲都沙晒，即刻發現歌手…同自己都已經老了。加上Eason已經唔再玩任何頒獎禮，聽到佢再出現係903嘅台上，就有一份傷感…

最重要嘅一件事，就係903對頒獎典禮嘅執著。以前有俞琤，而家有林海峰。佢哋嘅共同點，又或者對年度頒獎禮嘅態度一脈相承，當係一場show咁對待，每一年帶住唔同嘅message，今年就係「回憶同多樣性」，並唔係頒完獎就算。著重嘅係一班人嘅創意，去做一個內容豐富，值得觀眾、同埋一班注定冇獎攞嘅歌手都仆住去睇，呢啲頒獎禮，其餘三個台都唔會跟得上。

回憶的確容易令人受落，不過對於樂壇來講，唔能夠長期販賣。呢邊廂大家對陳奕迅、謝霆鋒有強烈感覺，另一邊廂都話今年903嘅賽果好唔容易正式地改朝換化，證明香港嘅樂壇變化速度追唔上進度。大家仲停留90年代、千禧年代有幾多好正嘅歌，一班出道咗好耐嘅「後起之秀」而家先勉強銜接到。除咗回憶之外，903往後要賣咩先可以代表到香港樂壇？呢樣嘢真係要再諗一諗，再用一場show去包裝，令大家覺得而家嘅廣東歌仲係值得聽。