【十大中文金曲】52歲郭富城又跳又唱冇喘氣 舞台王者非浪得虛名
撰文：黃浩晉
出版：更新：
《第40屆十大中文金曲－我和你音樂會》今晚於九展舉行，前輩後輩歌手濟濟一堂，為大家送上歷年來多首金曲。「四大天王」大家聽得多，不過年輕一代未必知，其實這個稱號是由港台一手捧出來。觀眾可能以為只有後輩歌手翻唱「四大天王」的歌曲，但真係估港台唔到，邀請到「舞台王者」郭富城出山，又唱又跳，已經50歲的城城完全無喘氣，四大天王之一果然並非浪得虛名。
郭富城城驚喜現身呀！（陳順禎攝）
郭富城型仔登場，打頭陣唱出《對你愛愛愛不完》，那個招牌手勢相信大家都識做，今晚城城就做多次俾你睇，係咪回憶返晒嚟呢？
城城出名跳舞歌，《對你愛不完》只不過是熱身，緊接唱出《狂野之城》，台下觀眾隨即「來吧 來吧 來吧 狂熱地野」企晒起身，睇得相當投入。城城承勢唱出《唱這歌》，相信大家都會記得歌曲的旋律和節奏，淨係睇個歌名都已經有聲，最後點少得「Generation X」抱膝型仔動作呢，贏盡全場掌聲。
+2
城城唱完三首歌氣都冇喘，被主持人問到入行以來最深刻的得獎經歷，城城賣口乖乖「應該係係新人嘅時候，第一個獎項係港台最有前途新人獎金獎，1992年！」他又話：「呢個獎項俾咗好多動力我，好大鼓勵，希望將來港台俾更多好獎項，俾希望成為歌手嘅新人。」最後城城更高呼：「希望港台唔單止係40年，可去到400年，4000年！」