鄧健泓MV邀譚玉瑛蓋世寶參演 《閃電傳真機》回憶返晒嚟!

撰文:洪曉璇
出版:更新:
鄧健泓足足5年無出新歌,自己包辦作曲填詞。

依家嘅小朋友,返學要補習上興趣班,返屋企有無窮無盡功課要完成,唔好話玩,連瞓覺時間都唔太足夠。唔似得那些年香港嘅小朋友,個個睇《430穿梭機》、《閃電傳真機》長大,主持兒童節目嘅藝人更成為小朋友心目中嘅天王巨星。鄧健泓相隔10年再戰樂壇開騷,新歌MV仲特別搵嚟《閃電傳真機》拍檔譚玉瑛、蓋世寶跨刀演出!

【童年回憶】播完近18年 《閃電傳真機》主持去晒邊?

鄧健泓於馬爾代夫蜜月之旅中不停為MV做準備,難得太太石詠莉相當體諒,更擔任其專屬化妝師。

香港近年成日講集體回憶,緬懷過去美好片段,鄧健泓(Patrick)當年於經典兒童節目《閃電傳真機》搖籃中長大,新歌MV為切合回憶主題,專誠搵嚟《閃電傳真機》3位舊拍檔主持譚玉瑛、麥長青(麥包)以及蓋世寶客串。佢地各自帶一件滿載回憶嘅私人物件,Patrick再將回憶化成文字。

鄧健泓新歌MV搵嚟《閃電傳真機》3位舊拍檔主持譚玉瑛、麥長青(麥包)以及蓋世寶客串。

Patrick表示:「首歌係講青春回憶,歌詞中嘅『你』係青春,我請呢幾位朋友喺屋企攞一件令佢哋有青春回憶嘅物件去拍攝。麥包嘅故事最傷感,佢喺MV拎住嘅遊戲機係同佢親生兄弟細個時候一齊玩,但佢嘅兄弟已經離開咗,我就寫咗好朋友,兄弟都可以好朋友,了解麥包你就會更加有感覺。」

「老朋友,你好嗎?很久沒見。」麥長青拎起同親生兄弟細個時候一齊玩嘅遊戲機,感慨良多。

蓋世寶抱住一隻陪伴她多年的毛公仔出鏡,Patrick話:「好多女仔會攬住隻公仔,開心攬住佢,唔開心攬住佢喊,甚至同佢傾偈,呢個就係佢表達嘅嘢,佢對呢件物件都做過呢啲事。」至於譚玉瑛姐姐就拎出一本日記簿,以前她確有寫日記的習慣,而無數人都曾將自己的感覺或把歌詞寫在薄上,變成好像罰抄歌詞,又會把歌詞套在自己和別人的身上。

「曾經總有某某陪你一起笑過,喊過,荒唐過。」蓋世寶抱住陪伴長大嘅毛公仔。

另外參演嘅嘉賓仲有孫耀威、蔣志光及鄭敬基。蔣志光拎咗一部walkman令Patrick相當感慨:「我寫嘅字句係『現在的唾手可得遠遠不及,曾經的用心經營』,就係講依家我哋嘅音樂唾手可得,隨時download到,但係以前我哋為咗輯錄一盒自己喜歡嘅歌曲擺落錄音帶,係需要過程同埋心機,所以以前嘅歌係咁刻骨銘心;亦都可以比喻依家嘅人或者愛情,所有唾手可得嘅唔會珍惜,用心經營過你先識得珍惜。」

「我還是喜歡用文字記錄,你曾經給我的美好。」譚玉瑛重溫當年日記簿嘅一字一句。
「現在的唾手可得遠遠不及 曾經的用心經營」蔣志光手上嘅Walkman,令同為音樂人嘅鄧健泓相當有共鳴。
「曾經我們都有著,金剛不壞之身」孫耀威帶來的是本土漫畫《龍虎門》的「龍虎三皇」figure。
「總有一些曾經是歷久常新的」至於鄭敬基的原子粒收音機,雖然破舊,但作用依然。

《那年。某日》

曲/詞:鄧健泓

编曲:葉肇中

監製:林潤明

 

某段 舊記憶繼續浮現

回味那個春天 青春不可蓋掩

曾踏過了多少 春風秋雨回憶不了

珍惜太少 感覺徒然

掛念 共你的那份堅持

還是愛聽 一起選的唱片

年月每天 耗損 跟你無法倖免

不會逆轉 卻要眷戀

某日我會記起

一切嚮往仍然是你

再度回味 當中一切未老死

那日會再一起 跟你可再從頭細味

幸福歲月裏 總會遇見你

歲月 烙印於每日跟前

其實已經 跑多圈都氣喘

年月太早揭穿   一切無法預算

仿似歷險 刹那太短

某日我會記起

一切嚮往仍然是你

再度回味  當中一切未老死

那日會再一起 跟你可再從頭細味

幸福歲月裏 總會遇見你

曾經一起 飛千里

無可媲美

某日我會記起

一切嚮往仍然是你

與我常在 當初一切未老死

那日會再一起  跟你可再從頭細味

幸福歲月裏 總會遇見你

幸福歲月裏 不怕老死