【專訪】薛凱琪新專輯方大同友情打造:錄足四年係錯有錯著

撰文:彭嘉彬
出版:更新:

薛凱琪隔四年沒有推出過專輯,過去一段日子,只偶爾推出單曲、亮相於電影、開開音樂會,讓一眾樂迷及粉絲望梅止渴。自去年舉行《夢之途中 薛凱琪音樂紀2017》演唱會,述說過去幾年有關薛凱琪的故事後,Fiona似是跟樂迷宣布即將全面回歸。打鐵襯熱,去年尾推出全新國語專輯《You Make Me Feel你我之間》,用一連九首作品來講述一個漫長的愛情故事。更找到了多年以來的音樂好拍檔方大同擔任專輯製作人,把四年以來音樂的精華全放到專輯內,到底這張專輯為何一做便是四年?
攝影:江智騫
Hair: Joey Hui @ Hair Culture
Makeup: Frances Ho @ Jessica Chan Make-up Workshop
Outfit: SPIRITUNUS

薛凱琪與方大同的奇特合作方式

講起薛凱琪的音樂,大致有兩類型是比較「剎食」,其中一種是像《Better Me》、《XBF》、《甜蜜蜜》等抒情慢歌;另一種則比較躍動,像是《9:55pm》、《周末畫報》等upbeat的作品。今次新專輯也不乏這類型的「絕殺」,不過用Fiona的語言來說,其實重點是在歌曲當中的「愛」。講起專輯概念,Fiona表示:「今次成隻碟都係用60至80年代嘅曲風,不論係pop、R&B以至小調,我同方大同都係以60s-80s為基調設計。其實每一首大同幫我作嘅歌,佢都唔知歌詞係點,每次佢寫好首曲,我再畀歌詞佢睇,佢又要因應個內容去改編曲。因為內容上係我自己監管,所以我決定今次將成隻碟獻畀一個愛情故事,我真係好鐘意戀愛,戀愛係一件好美好嘅事,我睇戲又要睇愛情片,睇書又係。最後成隻碟出嚟就係講緊一個女仔愛上一個男仔,而呢個男仔令到個女仔有呢九首歌入面嘅心情。」

Fiona與方大同合作,原來每次也是先有曲、後有詞,大同事前並不知道歌詞內容,唯有不停修改編曲。 (江智騫攝)

錯有錯著的四年

今次專輯用足四年時間打造,原因不外乎Fiona與方大同也相當忙碌,夾一首歌也用足幾個月時間,Fiona表示:「其實我同佢傾呢隻碟嘅時候,佢係未有自己嘅音樂Label,因為成隻碟嘅概念實際上係六年前,而去到籌備係五年半前,再到我正式錄第一首歌,已經係四年前嘅事。」而正因為這樣,Fiona表示其實這四年時間是錯有錯著。還記得去年開騷,薛凱琪道出一句金句:「所有人生中失去了或從不擁有的事情,其實也是你不需要的事情。」這些體會正是從這些年間學到的,而Fiona似乎對不少事情都看淡了,所以她在訪問中再爆出一句金句:「所有悲慘悲痛嘅事情都只係一個課目。我好相信呢個世界係好公平,當中自有一個好複雜但又美麗嘅結構,複雜到只有『佢』先明白點解你要經歷一啲痛楚,但其實每一份痛楚都係要我哋去學習。」

做碟的四年間,Fiona對人生及愛情的看法也有改變,她表示這四年是錯有錯著,令歌曲內容更有層次。 (江智騫攝)

幫粉絲圓夢

近年Fiona除咗做專輯、拍電影以外,其實亦有大搞自己嘅Fashion Label,完成今次專輯,Fiona又會否退下火線,全力發展時裝品牌?她坦言:「唔會,因為電影同音樂係一直影響我嘅生命、我嘅思維。至於點解時裝品牌喺咁忙嘅情況下都要做呢?其實呢個係我三、四歲嘅夢想,我覺得人一定要相信自己可以達成夢想,我細細個開始就會拎起支筆畫唔同嘅女仔,有啲係長裙、有啲係短褲,由嗰時開始已經有諗過將來要有自己嘅Fashion Label。到我達成咗自己嘅夢想,我就可以幫其他人達成佢哋嘅夢想,例如我嘅Fashion Label開始越嚟越忙,就要請人幫手,其中一個其實係我嘅Fans嚟。因為社交網絡上面有好多粉絲知道我鐘意畫嘢,於是佢哋都會畫我,然後tag返畀我睇,我全部都有睇,有時候會repost。其中有一個成日都畫我著唔同嘅衫,於是我就叫我partner去搵佢,直到而家佢同我係一個試驗嘅階段,去幫我嘅label畫唔同設計。」

想不到一個簡單的舉動,卻令這個粉絲大受感動,Fiona續道:「有一晚佢畫咗張素描畀我,後面有一段字寫住『多謝你請咗我,喺你搵我之前,我有諗過放棄我嘅夢想。尤其讀Art好難搵到出路,家人又會畀壓力,我有考慮過做一個打工仔就算數,直至你搵我,我終於對夢想有希望。』所以我好想透過呢啲故事話畀大家聽,冇嘢係冇可能。」

近年大搞Fashion Label,卻令Fiona有意外收獲。從自己圓夢,再到幫他人圓夢,滿足感截然不同。 (江智騫攝)

薛凱琪尚未完成的夢想

Fiona諗頭多多,除咗做歌手、演員、時裝品牌老闆,其實仲有好多對人生下半場嘅憧憬,包括開戶外演唱會、舉辦藝術裝置展覽、做導演,她大爆:「其實有一個電影劇本未做,要等我喺幕前冇咁忙嘅時候先做到。呢個故事已經有晒大綱,係一個關於地獄、天堂、人間嘅愛情故事,想講一啲關於有獎有罰嘅道理。」不過呢啲夢想並不稀奇,最有趣係Fiona笑說:「仲有一個夢想係想有自己嘅農場,我發夢見過自己種菜畀自己食,個感覺好好。」雖然帶點離奇,但卻不失浪漫。

聽Fiona講嘢有紋有路,但原來佢都有一啲離奇夢想,例如係擁有自己嘅農場。 (江智騫攝)

唔再推出實體碟

有關今次專輯,薛凱琪有一個重點想補充:「近年我買其他歌手嘅音樂,都係電子版本,對上一次會放CD入機聽已經唔記得係幾耐之前嘅事。就算我賣到十萬隻碟,我都覺得好唔環保,因為CD盒同CD都係唔可以分解,正當呢個世界變動嘅時候,總要有啲人行先,我希望我可以係首先唔出實體碟嘅人。」她更坦言:「我諗我以後都偏向唔出實體產品,就算一定要出,都只會出限量版,而且當中嘅產品要係實用,因為任何嘢唔用都係浪費。例如今次我推出一個限量版Boxset,入面都係無碟,只有headphone、月曆、notebook。因為樂迷佢哋需要一啲實體嘅物品畀佢哋紀念,所以我就諗咗呢類大家都用得著嘅產品。」

開始關心環保,Fiona決定不再推出實體碟,反以限量版Boxset滿足樂迷需求,重點是當中也不會有CD。 (江智騫攝)