張敬軒演唱會頭場「降兩度」勁搶戲 用個半鐘剃腳毛晒「美腿」
撰文：黃浩晉
出版：更新：
《Hinsideout 2018 張敬軒♭♭演唱會》今晚於紅館舉行頭場，樂迷引頸以待又「恨加場」，終於等到正式開騷，一探究竟軒仔會以「本人」或是「降兩度」身份登場。軒仔開紅館騷，一眾圈中好友現身支持，包括：阿嬌與老公（賴弘國）、欣宜、蔡一傑、任達華、JW、溫碧霞，等等。
攝影：陳順禎
張敬軒紅館騷頭場，打頭陣竟然係「降兩度」。（攝影：陳順禎）
+3
軒仔打頭陣以「降兩度」形象示人，一身珠片熱褲，兼夾高㬹Boot大騷長腿。軒仔又唱又跳勁歌熱舞，以串燒歌揭開序幕，出動埋泰文版《失戀》，又扭腰「擒高擒低」，出盡「舞功」唱Wonder Girls名曲《Nobody》。見軒仔咁落力，全場樂迷掌聲尖叫聲四起。
出名「奄尖聲悶」的降兩度出場，當然大爆金句，一開始就問「大家見過天后未？冇我嘅話張敬軒都開唔到6場呀！」降兩度又話：「咁多男士眼金金望住我，搞到我有啲高潮o添呀！係演唱會嗰啲呀！」
「降兩度」貴為「天后」，竟然話俾男fans望到「有啲高潮」。（攝影：陳順禎）
不過又唱又跳都未算高難度，剃腳毛先高難度，軒仔話：「你知唔知我為咗呢個演唱會，我剃腳毛都剃咗個半鐘呀！」此時有觀眾話：「女人有腳毛咩？」軒仔神回：「女人冇腳毛？有女人生鬚o添呀！唔信你今晚帶我返屋企吖，拮死你呀！我講啲鬚呀！」見軒仔去到咁盡，樂迷當然受落而且笑足全程。降兩度接着唱出《我半人》及《女神》，為「紅館史上最短的演唱會」劃上句號，讓張敬軒本尊踏上舞台，並唱出《酷愛》帶大家返回「張敬軒的舞台」。
「降兩度」舞姿撩人，落足力跳《Nobody》。（攝影：陳順禎）
+5