【唔編唔聽】《橙海》Bass Line平實不平凡 CK：彈得太多就唔夾
《唔編唔聽》來到第三集，有Supper Moment Bass手CK為大家講解，如何為《橙海》創作「啱數」的Bass Line。
攝影：鄧倩螢
Bass(低音結他)的聲音往往被大家忽略，因為相對地高音易聽的人聲、結他通常都擔當「主角」；但Bass這位「綠葉」亦非常重要，如果一首歌沒有低音支撐住，就會變得很「虛」，一堆高音浮在半空很不實在。足球隊都要有後衛守尾門，所以Bass的角色不容忽視。
即刻拉落去睇下CK點講啦！
點擊重溫Sunny同阿雞講解《橙海》的木結他、人聲及電結他部份：
【唔編唔聽】《橙海》爭啲變80年代老套歌？ 結他手阿雞一招拆掂
【唔編唔聽】Supper Moment編曲雞精班 逐粒音拆解《橙海》
彈得簡單先啱數！
聽過《橙海》的樂迷會留意到，Bass的聲音會在副歌部份出現，維持着穩定的節奏，只有簡單的Fill in(過門樂句)間隔，沒有複雜的技巧，如俗稱「拍線」的Slap & Pop。
CK解釋：「我哋Jam歌嘅時候諗緊，個編曲點樣可以輕鬆啲、自然啲，你冇理由對住個橙海咆哮㗎嘛，係咪先？」他續說：「我作為Rhythm Section(節奏部份)，呢首歌就係要簡單。同埋你聽返阿雞同Sunny都唔係彈得好複雜，主要做一個鮮明嘅節奏。」
還原基本步「Bass 101」？
講到「簡單先啱數」，到底如何應用？CK解釋要「食個Kick Drum(大鼓)」：「每當個大鼓響一下，我哋就賦予佢一個低音嘅音域墊住，去做個節奏。」他更形容令到《橙海》有種「涼涼地」嘅感覺。
被問到有冇試過「忍唔到手」Slap幾下？CK笑言：「其實喺Jam歌嘅時候都試過加多減少一啲嘢，自然地就會覺得『唔夾』，有啲『Un住』嘅感覺，所以試咗一、兩下就覺得『太多』。」
手多多打電子鼓變成《橙海》個Beat？
講完《橙海》Bass Line點彈，仲有一樣嘢關CK事，就係歌曲入面嘅電子鼓聲。
結他手阿雞笑言：「有次CK無端端玩Bass玩到厭，走去搞其他樂器，咁啱我哋有個電鼓插着咗，佢就喺到敲敲下，覺得幾得意喎個聲！呢個動作令成隊進入狀態，所以Groovy嘅《橙海》就成形喇！」
所以話，創作真係要「撞出嚟」，你又點諗到隨意敲幾下個電鼓會催生到一首歌呢？