BOYZ演唱會門票黃牛價炒高4倍 關智斌張致恒：之後仲有機會﹗
撰文：洪曉璇
出版：更新：
BOYZ首個售票演唱會門票秒速售罄。（關智斌IG）
香港地咩都要炒，炒樓炒車位炒月餅，演唱會黃牛更加係無處不在，不時喺Facebook群組見到寫明「非原價」發售帖，至於實際幾錢就要問過先知。BOYZ嘅關智斌同張致恒相隔多年再合體，首次舉行售票演唱會，一開售即刻秒殺。
唔知當年BOYZ身後呢班粉絲，會唔會乖乖地聽話著校服出席演唱會呢？（視覺中國）
見到反應咁理想，成為黃牛黨目標好似無可避免嘅事，連日來都見到唔少求票同售票POST，賣飛嘅寫明「非原價」都有好多人查詢，但到底係幾錢呢？呢日見到有網友POST左段同賣家嘅對話，上面寫住：「Boyz演唱會 S2-5 2連位 $4800，有興趣嗎？」
就係呢個Facebook私人對話，力証BOYZ個唱門票被炒至$4800﹗（網上圖片）
呢個賣家放售嘅門票，係紅圈位置絕對唔係頭幾行。（網上圖片）
$4800兩張﹗BOYZ演唱會最貴都係$580，即係足足炒貴4倍喎﹗睇返座位表S2-5仲要唔係頭幾行，會唔會過份咗啲呀。出帖嘅網友都話：「幾百蚊一張飛，炒到2000幾一張，雖然我好想睇，但我都吾會用幾千蚊去幫你買囉炒家﹗」獲大批網友紛紛和應。
作為一個理智歌迷，真係幾想睇都唔應該幫襯黃牛黨。（網上圖片）
忙於綵排嘅BOYZ聽到黃牛價都嚇咗一跳。（關智斌IG）
正在努力為演唱會彩排嘅BOYZ，接受《香港01》訪問時，知道炒賣情況都表示相當震驚，佢地話：「BOYZ絕對唔鼓吹任何炒賣演唱會門券行為，亦都呼籲大家唔好買黃牛。我哋依家好努力練習，希望做好16號個show、可以帶到一個開心、難忘嘅回憶俾大家。今次買唔到飛入場嘅朋友，唔好失望，只要有你哋嘅支持，之後仲可以有機會喺台上為大家表演。」
BOYZ話今次買唔到飛，總會有機會再睇佢地台上演出嘅。（視覺中國）