【專訪】環球新人Dusty Bottle型得起 初出道錄歌全屬自編自監

撰文:黃浩晉
出版:更新:

樂隊Dusty Bottle的作品圍繞Urban、R&B、Soul等風格,一字記之曰:Chill。前兩首歌曲《That Shit Raw》及《Don't You Know》分別邀請黃宇希(Shimica)與王嘉儀(Sophy)擔任主音,同屬「夜晚Chill」的歌曲,聽眾宜配威士忌「服用」。近日推出的《Forever Summer》搖身一變,由夜晚跳到太陽伯伯出來了,猶如帶大家一起出海「船P」癲番日。

Dusty Bottle未有固定主音,今次第三位「被選中嘅細路」是Jace(陳凱詠),她更包辦《Forever Summer》的歌詞部份,陽光、少女、型格等等元素一次過送晒俾你。

Dusty Bottle第三首歌曲《Forever Summer》邀請到Jace(陳凱詠)擔任主音。(葉志明攝)

《Forever Summer》極速完成 結他part兩take錄起咁堅?

雖然Dusty Bottle是初出道樂隊,但每位成員已有十幾年音樂經驗,可謂功力深厚。《Forever Summer》更是「即興」般完成,一天結他手Jeff到鍵琴手JNY的工作室,無意間聽到一段JNY寫下的Beat便覺得:「太正喇!要整首歌呀!」又提議加入結他部份,Jeff形容當時他還在熱身,豈料彈完第二take,JNY二話不說:「就要呢take啦!」亦即大家所聽到出街版的結他部份。

除此以外,Jace在收到歌曲後三日就完成填詞,錄音當日也只花了兩小時,整件事可謂「光速」進行。Jace又透露:「其實最初我都怕個Tone(聲線)太Bright、太過跳脫,不過Jeff都俾咗好多方向我,因為佢都好熟Vocal嘅事情。」

Dusty Bottle型得起有原因 一手包辦編曲、監製、Mixing

音樂人非常着重創作自由度,尤其樂隊能夠實現自己的想法,才能建立鮮明的風格。你可能會想「自己作曲、自己填詞已經好自由啦」,但Dusty Bottle去得更盡,編曲、監製、混音也是親自完成,實在非常幸福。

結他手Jeff興奮說:「估唔到咁快可以俾我哋接觸到,我哋自己去Mixing(混音),監完Vocal(人聲部份)再去修剪,差唔多所有全部都係自己做晒。其實我哋都好想咁樣做落去,因為音樂上可以每個細節都親自照顧,令首歌更加屬於自己,我哋會更加投入!」

Dusty Bottle雖然外表cool啲,但一講起錄音合作過程即刻笑晒。(葉志明攝)

外國流行多年 在香港忽然變「小眾」?

樂隊加入電子元素,Urban、R&B的風格在歐美地區很普及,也是流行曲,但Dusty Bottle在香港卻視為「較另類」的聲音,會否覺得聽眾有點落後?Jace表示:「我覺得未必係落後,但的確我好認同,喺外國呢種風格流行,嚟到香港卻變成Indie、小眾。不過依家多咗人聽Hip Hop、Rap等等嘅音樂,我覺得係有一個好大嘅潛在市場。」的確潛在市場越來越大,近年聽眾追求更多選擇,而非單一種「即食」的聲音;而Dusty Bottle正正帶來樂隊另一個面向,除了大家熟悉搖滾樂之外,其實樂隊一樣可以好Chill。

想聽Chill嘢?介紹返,佢哋Dusty Bottle同Jace陳凱詠。(葉志明攝)