張智霖練定十字步隨時伴舞 共舞曾令薛家燕受傷入院變童年陰影
撰文：洪曉璇
出版：更新：
今年係薛家燕入行60周年，佢正密羅緊鼓為12月舉行嘅演唱會進行綵排，身為嘉賓之一嘅張智霖與家燕姐合唱大展歌喉，Chilam仲話拍劇時二人已經結緣，所以對方開騷點都力撐，仲會練定「十字步」以備不時之需：「我已經拉定筋架啦，隨時準備好！不過我同家燕姐唱歌就好夾，但跳舞就真係唔多夾，記得上一次同佢拍劇個陣，因為跳一小段舞，搞到佢整親要入醫院，呢個成為我童年陰影。」
Chilam一見到家燕姐即刻要攬攬先。（影片截圖）
家燕姐聽到即刻笑到收唔到聲，仲爆料指當年全靠Chilam急才，先避過急症室排長龍睇醫生：「嗰時跳舞整親要去急症室，點知等好耐都冇醫生睇我，Chilam冇啦啦攞份馬經入黎問我買邊隻，我心諗依家咪搞我啦！原來佢就係想分散我注意力，靜靜雞急Call跌打師傅黎，然後佢對護士話鐵打師傅係我亞叔，當時我仲一頭霧水唔知邊個亞叔黎探病，鐵打師傅幾下手勢就搞掂，原來係我軟骨移位，我仲可以急急腳出院。」
Chilam笑言早已秘密練好十字步，預備演唱會上隨時要表演。
演唱會綵排踏入最後階段，家燕姐與樂隊默契十足，不過因疲勞過度出現喉嚨痛，嚇得家燕姐急急搵醫生保護聲帶：「我好乖依時食藥，依家就冇咩事，不過唔可以講太多野，要小心食野先得。」
另一位嘉賓謝天華讚嘉燕姐清減咗，仲笑言要建議造型師改晒做橡筋褲頭以策安全。