【我不怕唱歌】 電台DJ原來係靚聲王 黃宗澤驚嘆:佢唱歌咁好聽

撰文:林通賢
出版:更新:
除了黃宗澤外,兩位唱得之人鄭俊弘、許廷鏗都讚,就知這位DJ有實力。

《我不怕唱歌》來到第5集,今次請來一位前新城女DJ,她唱了梁文音《我不是你想像那麼勇敢》和JW《矛盾一生》兩首高難度歌曲,黃宗澤聽了便說:「不如叫佢出碟啦。」鄭俊弘亦激讚:「把聲好清有力,技術好,唱到高音識用力,唔會唱得辛苦,希望可以同佢合作。」許廷鏗更說:「唱得好喎!我問下老闆簽唔簽佢!」三位對她有高度評價,但她一直沒機會唱歌,為了當歌手她試過參加過百個歌唱比賽,亦試過主動向唱片公司敲門,但全部碰壁,更被鬧得體無完膚,金培達、陳少琪叫她學多10堂唱歌才再來,有人嫌她樣子不吸引,甚至太肥,更有人叫她拿30萬出來才捧她當歌手……她只有暫把唱歌放在一邊,等到有經濟能力,她再次追夢。

場地:Singing Square 香港流行歌唱訓練中心

鍵琴手:Hidy Lo

髮型:Roy Chow

首飾:JEES

瑪姬(張卓賢)自小愛唱歌,由好恨做歌手,到現在明白當歌手不是唱得好就可以。

她是瑪姬(張卓賢),前新城DJ,主持過《3G21》、《娛樂旗艦店》、《越夜越音樂》等,從小就喜歡唱歌,她說:「我真係好鍾意,由細個已經知道出咗事,第一首識唱嘅係張學友《太陽星辰》,我直頭跳出嚟,熄咗爸爸媽媽睇緊嘅電視,跳上梳化頂當台,迫佢哋聽我唱歌,由中學開始參加歌唱比賽,肯定超過100個。」

05年21歲的瑪姬參加了新城和Neway合辦的《星途大戰》歌唱比賽,當日評判有李克勤、陳慧琳和當時新城電台台長朱明銳(鋭哥),瑪姬只得第10名,但得到銳哥賞識,請她當DJ,入行後日日接觸音樂界,要做歌手應該沒有難度,但事實並非如此,她說:「當時銳哥叫我唔好再參加比賽,話同DJ身份有抵觸,我又唔知點解咁聽話,或者當時做DJ又好順啦,跟住司儀工作又多,我就擺低咗唱歌呢樣嘢。」

瑪姬曾被唱片高層批評不夠瘦,所以努力保持身型。

瑪姬雖然沒有再參加比賽,但亦有為做歌手夢努力,她說:「直頭敲門問人,你有冇興趣簽我,有問過金培達、陳少琪,當時佢哋叫我上多10堂唱歌學好先嚟再揾佢哋,佢哋神級,我好多謝佢哋話我有咩問題,亦見過農夫舊唱片公司(Clot Media Division),佢哋話我外型唔係好適合,之後佢哋簽咗樂瞳,(有冇嬲簽樂瞳都唔簽妳?)冇,絕對冇,嗰陣可能興cute,當時佢哋覺得佢適合啲。被人話妳唔靚,妳唔夠瘦喎,妳好難做得起,全部聽過哂。」

瑪姬是孝順女,爸爸在她20歲時候離開,她就一直照顧著母親,今年更為她舉辦70歲大壽。

從小到大鍾意唱歌,又敲門自薦,但賺錢對她來說更迫切,因為瑪姬20歲那年爸爸離開了,頓失家庭支柱,身為獨女的她向媽媽許下承諾,她說:「我會提供到同Daddy一樣質素嘅生活,其實媽咪冇要求,係我要求㗎咋。」當DJ之後,她不斷工作,狂接司儀騷,對媽媽承諾做到了,自己亦買樓買車,她說:「我一入咗電台,就將唱歌擺得好後,我將搵食擺前,想快啲買車、置業,我就盡快攪掂佢,做到喇,我就諗返其實我都鍾意唱歌喎。」

瑪姬和老友路芙一同參加《麥王爭霸》,評判之一張敬軒大讚瑪姬。

為重追唱歌夢,瑪姬2012年自資出歌,推出了單曲〈諾貝爾愛情獎〉,但她不是為了出碟,或引唱片公司簽約,她說:「呢個年代唔係為出碟,唱片只係我name card,我要自資出碟的話,我直頭派俾人啦,但參加《麥王爭霸》我初時無諗任何嘢,直到入咗最後49強嗰陣,我就返嚟喇,我就諗返其實我要人知我識唱歌,因為真係無咩人知,我好想俾人知道。」

在廣州舉行的《麥王爭霸》評判之一的張敬軒大讚她唱得好,更說她當DJ是幫歌手追夢,她說:「軒仔話每一個歌手都追緊夢,仲話我當DJ嘅時候都有一個夢,但我將個夢擺低咗,去幫其他人實現佢哋嘅夢想,軒仔仲話DJ係歌手嘅恩人,我覺得好感動。」當DJ幫人追夢,亦令瑪姬明白追夢的代價,她說:「呢個樂壇唔係你唱得就可以,好多嘢需要配合,一個歌手成功,唔係靠一個人,係後面有一個好勁嘅團隊去support,但香港樂壇係咁,好多歌手都唱得,但無論點唱都唱唔起,每個人就不斷出歌,搏一首爆紅,然後上位,我做DJ嗰陣見到好多呢啲例子,唱到灰心,唱到無錢開飯,唱到算喇,我都係去賣保險喇。」

瑪姬現為不少大公司指定的司儀,她亦希望有天好像鄧梓峰、鄭裕玲一樣,成為神級司儀。

瑪姬現時是著名的司儀,不少大公司的年度晚宴指定要她擔任司儀兼唱歌,她希望更多人知道,最近更簽了王祖藍的經理人公司,但公司有林欣彤,不過瑪姬自知沒有得比,她說:「我只係想公司知道我好勤力,希望都幫下我,但都有林欣彤,我梗係冇得比啦,佢咁唱得,粉絲羣又多,本身已經係歌手,我係老闆都會推一個易啲上架啦,我好明白,所以我會自己努力先,試下自己製作歌曲,放上YouTube,希望公司有日都會推一推我。」