古天樂演唱會昨晚（22/8）舉行尾場，原定唱完《今期流行》後便結束，但現場觀眾一直大喊Encore，連宣萱及胡子彤都企起身一齊嗌，令全場觀眾都唔肯走。最後古天樂再次出場，並再次感謝觀眾的熱情︰「你哋太好，真係好多謝你哋！我竟然去到紅館開演唱會。」最後，他選唱張國榮的《風再起時》作結，唱之前更哽咽地講一次：「多謝大家！多謝哥哥！」

「答應過大家做一個最好的演唱會」

完騷後，古天樂去到後台接受傳媒訪問，問到完騷後最想做甚麼？「開完係有少少亢奮，可以講去到虛脫。呢一刻最想係畀我瞓一個下晝唔好起身，今日仲攰，個Ending又草蜢又華哥（劉德華），我自己仲要跳，整個Ending長30幾分鐘，好攰。」

回想籌備演唱會過程，古生就是堅守一個承諾︰「我答應過大家做一個最好的演唱會，7月初開始，我已經每晚凌晨3、4點煩住每一個人，因為我冇經驗，只有盡力做到最好。最重要係，你唔可以唔相信自己去做一件事，你一定要相信自己做的每一件事。現今世界，人人都面對不同困難，好好地踏出第一步，做你應該做的事。」

舞台多個裝置拉近與觀眾距離

演唱會上古生有多個環節都要跳舞，甚至邀請草蜢做嘉賓來個大對戰，兩晚過後會否對跳舞已經上癮？「跳舞嚟講係唔會上癮，你放心。開騷前兩個月，同排舞老師跳到３、４點呀陰功，但唔係研究點跳，係點樣做到氣氛出嚟，我要同現場觀眾做到一個連繫，呢個先係最開心。」

正因為要求跟觀眾有聯繫，所以演唱會舞台設計，做到機關重重，令自己無論跟前排觀眾、山腰定山頂觀眾，都可以接觸到。「呢個係我第一個要求，今次演唱會要接觸晒所有人，包括下面同上面嘅觀眾，唔好淨係企喺台度唱歌，一定要接觸所有人，握手好，上山頂好，必需要做呢件事，盡量開一個最開心，大家最多接觸的演唱會。」

不敢辜負張國榮期望　「點樣做好去係好緊要」

演唱會上，古天樂唱了多首張國榮的經典歌，壓軸Encore更以一首《風再起時》作結，原來這是古生對哥哥的小小心意。「（工作人員）今日同我講，最後一場，觀眾可能想我唱多一首歌，大家冇特別意見，我就提議不如唱《風再起時》，就是哥哥告別樂壇的一首歌。我自己都有一Part唱哥哥的經典歌曲，佢喺我心目中有一個好重要嘅位置，揀唱《風再起時》，係唔知自己仲有冇機會開第二次演唱會，今日係一個暫別，我好想唱呢首歌。」

當年張國榮，曾點名睇好三位新人，分別是古天樂、古巨基及鄧一君，結果眼光獨到，古生亦承認因此想在演唱會上，多謝哥哥，向他致敬。「哥哥對於樂壇，對於我哋後輩，甚或你問我，佢今日唔喺度，對我哋嘅期望，我哋點樣做好去係好緊要。」對於圓了紅館夢，最大感覺是甚麼︰「人係需要努力，需要相信自己，紅館畀我感覺係好接近大家，我哋都需要多啲接近大家，多啲聽大家的感受去做每一件事。」

難忘32年後跟阿姐唱《熱咖啡》　「係無憾！」

兩晚演唱會，請了多位重量級嘉賓，包括汪明荃、劉德華，對古生而言，最深刻是請到阿姐出山唱《熱咖啡》。「因為阿姐好耐冇唱《熱咖啡》，亦是我32年前（入行一年後），就同佢唱《熱咖啡》，我伴舞。如果我得一次機會開演唱會，我好想有一個嘉賓喺我心目中，係我當年最好嘅回憶，所以有機會開紅館演唱會同佢唱到呢首歌，係無憾！」

而阿姐工作態度之認真，更叫古生深深臣服。「由開始在啟德綵排，到去紅館綵排，佢完全係Full Dress，好認真，每個細節都要知道，會問會傾，真係太完美。」更叫古生開心是阿姐正是媽媽的偶像，今次個唱促成大家一個見面。「我記得第一晚開騷，阿姐好早嚟到，我阿媽坐旁邊，我哋三個一齊傾咗半粒鐘，因為阿姐係我阿媽偶像。」

至於劉德華，古生表示私下不時有食飯，更經常鼓勵自己。「喺我心目中佢領導緊成個圈，對後輩、對樂壇、影壇都係好支持，我好感動。」