【黃子華棟篤笑】累紅館清潔女工被炒 投訴人寫電郵現身反駁

撰文:陳芷昕 李家偉
出版:更新:

黃子華《金盆𠺘口》棟篤笑2018落幕,不過一場涉及黃子華粉絲上廁所的爭議則於近日發生。
在7月中其中一場散場時,一名女觀眾在廁外排隊,聽到清潔女工「雪姐」當着數人面前,斥責黃子華粉絲「屙到周圍都係」,女粉絲不忿被辱罵,於是追着雪姐投訴,令她被炒,丟了這份做了23年的工作。根據雪姐向工會提交的自白書,女粉絲斥責她賤、cheap,所以才做清潔工,令雪姐感到委屈,認為對方蔑視清潔工。
涉事女觀眾黃小姐現身,撰寫電郵給《香港01》,反駁雪姐指控,強調只是斥她口賤,而非指清潔工低賤,並誓言「如果有,本人發誓出街俾車車死!」

事件中的員工雪姐在紅館工作23年,因被投訴態度欠佳失去工作,事件引發網民爭論。投訴人黃小姐現身說法,反駁雪姐信中內容。(資料圖片)

在紅館做外判清潔工23年的雪姐,上月15日晚上黃子華棟篤笑完場後,在其中一個廁所外與一名女觀眾發生爭拗,導致65歲的雪姐被解僱,她因而向職工盟求助。及後事件曝光,《香港01》報道了有關事件,佐以雪姐手寫自白書,闡述事件的來龍去脈,她承認當晚曾說過「今晚啲fans唔乖屙晒喺地下」 。

被指因作出投訴而令雪姐失去工作的投訴人黃小姐,昨晚(25日)向《香港01》發出電郵,聲言要「澄清有關事實嘅全部及對我不實指控的報道」,形容雪姐是「一位霸氣十足嘅阿姐」,「態度好似趕狗咁趕大聲」,內文力指雪姐確實說過「今日都唔知係咩fans嚟嘅!屙到周圍都係」,仍在排隊的黃小姐感到被羞辱,又不滿雪姐對觀眾呼呼喝喝,終於按奈不住,向紅館作出投訴。

《香港01》整理二人的書面「證供」,讓讀者了解兩人的爭拗。

黃子華上月初舉行一連26場的《金盆𠺘口》棟篤笑開場。(資料圖片/余睿菁攝)

爭議一:清潔工人雪姐是否曾指「FANS不乖,地上有尿水」?

雪姐書面解說:......當晚為何不停有人屙在上地變成小水塘......及後到散場,大約10分鐘後,(我)便入內睇睇廁格內的情況,發現右邊一格又變成大水塘。我就對住地下講「今晚啲Fans唔乖屙晒喺地下」,便繼續清理它。

投訴人黃小姐電郵反駁:清潔工阿雪突然拋出一句:「今日都唔知係咩fans嚟嘅!屙到周圍都係......又搞到污糟邋遢,仲話係黃子華啲fans喎!!」(好明顯係畀說話我哋排緊隊嘅人聽啦!我唔信佢係同空氣講或同地下講!)難道她覺得我哋排緊隊嘅全部都係失聰人士,聽唔到佢呢番含有侮辱性嘅說話??抑或她自說自話淨係講畀自己聽?

爭議二:投訴人是否以「賤」、「cheap」形容雪姐所從事的清潔工?

雪姐書面解說:我話對住地下講,唔係話你(投訴人黃小姐),又唔係你做。她就開口鬧我賤、cheap、有幾次(係鬧)賤字,又話我咁cheap,要做呢啲工囉!又再鬧我,我回應她我真係好低下層次㗎,所以我便做呢啲工囉!

投訴人黃小姐電郵強調當時說:「如果你覺得呢份工作咁厭惡性,你可以唔做㗎!! 點解你把口咁賤嘅??」
(本人從沒有説過她的工作低賤,cheap到要做呢份工,如果有,本人發誓出街俾車車死!)

黃子華棟篤笑《金盆𠺘口》開騷前,先引起黃牛黨賣票爭議,想不到完了卻又出現炒人風波。(資料圖片/林迅景攝)

爭議三:雪姐逃避被投訴?

雪姐書面解說:及後66閘有位紅衫帶位男同事見到她不停鬧我,他行落嚟叫我先走,但她還跟着我,一路行一路鬧「你唔好走呀!」我話畀她聽我要收工,及後就有你哋(紅館)啲經理同事上來了解情況。

投訴人黃小姐電郵反駁:我終於按捺不住,我走向她要求她提供姓名,説要作出投訴!她立即用手蓋住她的職員証,沒有理會我......
跟著她離開!我便跟着她後面,追問她的姓名。因為清潔工阿雪不斷走,我就一路跟上,問她的名字也不回答!!走咗好一段路,終於有紅館嘅工作人員上前跟進,當時我表明這位員工態度惡劣,我要作出投訴並記下她的名字!職員表示會作徹底調查。

對於這宗紅館清潔工與粉絲爭拗,不知黃子華會否開金口評論?(資料圖片/林迅景攝)

事件中各持己見,職工盟曾為雪姐抱不平,指睇騷又何苦投訴人,導致雪姐失去工作。黃小姐則強調,電郵所說是當晚所發生情況,聲言一字不漏,又隔空再批雪姐態度有問題,「請不要罵怨責怪別人對你的投訴!……如果我一個投訴可以令你無咗份工,你是否應自我檢討你對人(觀眾)的態度呢?」

事主黃小姐來函原文:

致香港01編輯部:

你好!本人姓黃,便是7月15日於紅館被指[破口大罵]清潔工阿雪的當時人。希望香港01報道整件事嘅來龍去脈,還本人一個公道。

我必須要澄清有關事實嘅全部及對我不實指控的報道。

本人和友人於7月15日到紅磡體育館欣賞黃子華棟篤笑,開場之前,我和友人到女廁廁所排隊等候去洗手間,突然有一位霸氣十足嘅阿姐態度好似趕狗咁趕大聲叫著:唔好喺度排隊喇!呢度濕咗呀!去第二個啦!即刻欄住唔俾我排隊....

本人與友人都不以為意便決定不去洗手間,反正也到開場時間。

完場後,本人與友人再到清潔工阿雪管理範圍的洗手間排隊(因為這洗手間是最接近我們座位的位置)

她首先第一句呼喝:你哋企埋一邊啦!阻住晒個出口(其實紅館觀眾已差不多走晒,只剩下我們六七位女士排隊去洗手間)

本人排最尾,友人排的位置剛在廁所門口位....

清潔工阿雪突然拋出一句:今日都唔知係咩fans嚟嘅!痾到周圍都係....又搞到污糟邋遢仲話係黃子華啲fans喎!!(好明顯係俾說話我哋排緊隊嘅人聽啦!我唔信佢係同空氣講或同地下講!)難道她覺得我哋排緊隊嘅全部都係失聰人士,聽唔到佢呢番含有悔辱性嘅說話??抑或她自說自話浄係講俾自己聽?(本人重申,由開場前至完場,我與友人都係第一次排隊去洗手間!)

她講完之後,特登走入廁所撞咗我友人個袋一下,並説:你個袋阻住出入呀!!(註:清潔工阿雪姐入厠所唔係檢查廁所,佢入去轉個身就出返嚟!同埋我友人只佔度門嘅一半! 如果有人要過,可以講句唔該借借,友人一定會讓你過!或者可以打側過一定過到!)

本人實在看不過眼她的態度!對人(觀眾)呼呼喝喝!本人到紅磡體育館欣賞演唱會、楝篤笑都好多次,從來所有管理廁所的姐姐都好好人, 這是第一次見咁有霸氣嘅雪姐!我終於按奈不住,我走向她要求她提供姓名,説要作出投訴! 她立即用手蓋住她的職員証,沒有理會我.....

我:如果你覺得呢份工作咁厭惡性,你可以唔做㗎! ! 點解你把口咁賤嘅??

(本人從沒有説過她的工作低賤,cheap到要做呢份工,如果有,本人發誓出街俾車車死!)

跟著她離開!我便跟著她後面,追問她的姓名

因為清潔工阿雪不斷走我就一路跟上,問她的名子也不回答!! 走咗好一段路,終於有紅館嘅工作人員上前跟進,當時我表明這位員工態度惡劣,我要作出投訴並記下她的名字!而當時職員謂紅館要淸場,所以我和紅館職員在館外道出來龍去脈,職員表示會作徹底調查。

以上是當晚所發生嘅情況,一字不漏!

我諗清潔工雪姐本人比較善忘,所以沒有提及自己在工作岡位上「卓越」嘅服務態度!!

本人也做服務行業,也不讚同~~顧客永遠是對的!但當職員態度有問題嘅時候,請不要罵怨責怪別人對你的投訴!! 而另一面就向傳媒顛倒是非黑白以及只懂裝可憐扮弱者!什麼只想討回公道?! 你的態度如何,你的後果也必如何.....

P.S.如果我一個投訴可以令你無咗份工, 你是否應自我檢討你對人(觀眾)的態度呢?

25/Aug/2018

被清潔工阿雪誣蔑的人