【新界大水浸】水浸坪輋狗場500貓狗大疏散　2狗遇溺身亡平姐悲慟

周三(29日)一場豪雨，不但令新界多處地方出現水浸，更淹斃了平姐貓狗舍的兩隻狗，包括一隻14歲的臘腸狗及一隻小唐狗，平姐一想起兩隻溺斃的狗便聲淚俱下，「一睇到我真係忍唔住，眼淚係咁流」，「由其是嗰隻狗BB，係由我手掌咁大時救返嚟」，「為佢餵奶、醫眼，所以點捨得佢走」。

平姐憶述當日洪水湧至的情況，「今次真係估唔到咁勁」，「佢(村民)而家七十幾歲，第一次見到浸到咁勁」，「下晏四點幾開始水浸，浸到我腳面，六點幾浸到膝蓋，望住個水升，夜晚七點幾已經到心口，咁多狗我話點算呢？」，「浸咗七個幾鐘，你冇辦法，我跌咗三次落去，好彩有姐姐拉我起身，唔係我真係死咗，浸到咁高，所以真係好恐怖。」

她指當時十分徬徨，「我唯有放佢哋(狗)出嚟，我唔想佢哋死，我就放佢哋出嚟自由走」，她指當時貓狗舍外的馬路十分混亂，洪水把馬路淹作汪洋一片，更有五輛車被洪水沖到相撞；「警察入嚟拉我走，消防員同警察拍門，叫我快啲出嚟要救我走，我話我唔走得，佢問點解唔走得，我話呢度有五百幾隻狗，我話一定要佢哋安全我先走得。」

由於水浸嚴重，平姐一度將籠內的貓狗放出來，「我唔想佢哋死，我就放佢哋出來自由活動，佢哋就很開心在游水。」其中兩隻則連同狗籠放到高處避水，之後她在水退後清理現場，發現有狗籠在水浸期間疑被撞跌，有2隻狗慘被浸死，其他則無恙，「但我估唔到水力咁猛，沖翻個雪櫃，就跌左落去。」

幸得一眾義工幫忙，平姐貓狗舍內目前已大致清理好洪水帶來的破壞，不過貓狗舍損失慘重，冰櫃及冷氣等電器也報銷，閘門的鐵鎖也被沖至變形，只能用鐵枝暫時取代，很多狗糧也被洪水浸壞，暫時只能依靠義工捐贈的狗糧維持；而貓狗舍外的馬路亦可見被水沖至路陷，路邊的野草也被沖得連根拔起。

平姐又認為天文台發出紅色暴雨警告訊號太遲，「如果我哋知道紅雨、黑雨，可以預算抬高啲嘢，之後我哋七點幾開始抬，但當時已經好遲，已經浸得好勁，啲水嚟得好急。」