【行山團攻港】領隊需懂急救有PlanB 山藝教練：唔係揮吓旗就得
來港行山的內地團，領隊只行過相關路線一次就帶團，也沒受過任何專業訓練。香港山藝協會創辦人兼總教練梁梓浩（Sunny）表示，行山絕不兒戲，帶隊上山需做足準備，如要熟悉路段及附近多條路線等，更要帶備足夠食水，及具備基本急救資格。對於近年湧港的內地行山團，他認為只屬於一般郊遊團，一旦發生意外，領隊亦未必有任何應變方案。
梁梓浩創辦的山藝協會，提供山藝訓練證書課程。他指該會對攀山領隊的要求，是根據國際攀山聯盟（UIAA）訂立的規例，需至少具備野外急救資歷，「本港一般要求行山領隊持有基本急救證書，我哋覺得可以多啲，因為當意外發生時，拯救部隊由定位到提供治理至少要兩小時，領隊的支援相當重要，中暑、熱衰竭到擦傷也應要懂得處理」。對於近年內地行山團湧港，Sunny笑言，相信該類屬一般郊遊團，「領隊應該唔會講究呢啲專業資格」。
當領隊前 應考取三級山藝訓練證書
香港山藝協會提供山藝訓練證書課程，分一級至三級，Sunny表示，一級及二級屬體驗課程，「學基本遠足技巧，志在享受山藝樂趣」，至於帶隊行山，他們則要求學員至少考取三級山藝訓練證書，「三級屬於領袖級，唔只打兩個結咁簡單，會要求佢哋做多啲presentation（報告），例如點處理意外等；打結亦要打到成個繩索系統，例如有人跌落去，你可以游繩爬落去睇吓佢，唔係拯救，而係陪伴，幫佢定位或包紮止血，等正式救援隊到來時就簡單啲，可以做少好多嘢」。
Sunny舉例指，美國NOLS（National Outdoor Leadership School）甚至要求團友詳細申報身體狀況，「你平時做幾多運動、做運動時平均心跳幾多，領隊都要知」，本港的領隊一般也會要求團友填寫健康申報，如團友患有心臟病、高血壓等疾病，中暑機會較高，領隊亦應加倍注意。Sunny又指，正常領隊與團友比例是1:8至1:10，但需視乎每位團友的能力。
領航技巧包括緊急撤離路線策劃
Sunny補充，帶隊行山講求領航技巧，「唔係數吓人頭，揸住支旗仔揮吓就得」。他解釋，領航技巧包括行程策劃、緊急撤離路線策劃及後勤支援等，「仲要透過同團友傾計，觀察佢哋嘅身體及精神狀況，好考臨場應變」。Sunny指，本港部分郊野路段雖然難度較低，惟遇上天氣不穩時，容易發生意外，絕不能掉以輕心。協會要求領隊出發時需帶備基本急救包、繩索系統所需工具及至少3公升的水，「啲人成日話北潭凹有汽水機撳，一旦遇上有人在附近訓練或有內地行山團經過，乜都畀人撳走晒」。
就飛魚臨時更改行程，Sunny表示，領隊需有多個後備方案，只行一次便帶隊，難以令人信服其應變技巧，「（內地領隊）如果只行過一次，唔會知龍脊有其他路走，亦都唔知麥理浩理二段對體力要求有幾高」。他又指協會的領隊會因應天氣變化調節路線，「啲人笑我哋好怕死，係呀，我哋真係好怕死，所以先會安全」。
