葵涌石蔭邨勇石樓19樓一個單位，今日（3日）早上7時許發生火警。消防出動一條喉及一隊煙帽隊灌救，18分鐘後將火救熄。事件中無人受傷，約100名居民疏散落樓；消防稱單位內的沙發和雜物着火，起火原因有待調查。

住19樓的羅女士憶述走火警經過稱，她準備湊孩子返學，不料同層單位火燭：「我打開門見到好多煙，好大煙，攞嘢準備走，一出嚟走廊睇唔到嘢。」她表示起火單位在電梯大堂另一邊，但濃煙擴散：「睇唔到嘢呀！行唔到，黑麻麻，行樓梯，見到啲人（鄰居）都叫佢走。」

住中層單位的鄭同學稱，他當時熟睡中：「瞓緊覺嘅時候突然阿哥叫我起身，我唔係好聽到，係好輕微嘅警鐘，好似平時測試警鐘嘅聲，所以並無在意，阿哥好大聲叫，我先知係真。」

接着他和家人沿樓梯走火警：「門口唔覺有火，其他人指示行樓梯，去到19樓好大煙，掩着鼻跑落去。」

警方經初步調查後稱，起火單位女住戶姓張67歲，較早前煲粥後落街購物，折返時發現火警，嘗試救火但不果；起火原因疑是客廳的拖板短路所致。