網上近日流傳一段片段，一名女子乘搭的士時遇上塞車，更發現司機突然吸煙。女乘客自稱有鼻敏感，不願吸食二手煙，遂要求司機停止食煙，惟對方以「塞到好忟呀已經」為由拒絕，僅願開窗散味，雙方僵持不下，女乘客怒斥：「你食之前係咪要問吓個客得唔得㗎？我唔食煙㗎，大佬！」片段曝光後，大批網民亦聲討的士司機，並建議女乘客拍下的士司機證舉報。

片段顯示，涉事的士當時正行經交通擠塞路段，一名蓄鬍鬚的男司機在車廂內吸煙，坐在後座的女乘客表示：「可唔可以唔好食煙？因為我鼻敏感。」司機吐出一口白煙後拒絕，僅稱：「開啲窗先囉，塞到好忟呀已經。」

女乘客隨即反駁：「我都好忟呀，我好躁底添呀司機！我啱啱同人打完交嚟。」惟司機堅持只開窗處理。其後女乘客被煙味熏至連聲咳嗽，質疑的士車廂內依法禁止吸煙，強調自己「我唔想食二手煙啫」，並斥責司機：「你食之前係咪要問吓個客得唔得㗎？我唔食煙㗎，大佬！」期間的士駛經一輛正在處理意外的警車，司機未有再回應。

片主上載片段後揚言：「奉獻大家以後真係咪再坐的士啦！唔可以助長班的士佬咁過份對乘客囉！」不過有網民亦理性分析，勸片主勿「一竹篙打沉一船人」。此外，不少網民認為的士司機已經違法，應該立即作出舉報：「影埋佢張司機證，舉報佢」、「呢個的士佬真係黐線，的士裏面已經有個牌寫住嚴禁吸煙啦，違者罰款$5000，黃底黑字㗎黐喺道門度。事主經過桇警車，應該揮一揮手叫警察上前。呢啲的士佬唔應該放過佢。」

根據《吸煙(公眾衞生)條例》第371章第2(1)條和第4條，任何人不得在公共交通工具內，吸用或攜帶燃着的香煙、雪茄或煙斗。根據《吸煙(公眾衞生)條例》第371章第7(1)條，任何人違反《吸煙(公眾衞生)條例》第371章第4條，即屬犯罪，一經循簡易程序定罪，可處罰款$5,000。即使的士沒有載客時，的士司機亦不可在車廂吸煙。