【讀者創作．短篇】假喪屍為保命加入咬人隊伍 結局竟然神反轉…
有一天醒來，發現自己「進化」了，長出尖銳的獠牙，明明腦袋還是清醒的，卻要不斷抑制身體衝出去咬人磨牙的衝動......
【文章原刊於01撐場，歡迎下載香港01 app，與更多作者一同討論喜愛話題。】
無論我點樣逃避，我最終都逃唔過呢一劫。
喪屍牙咬穿我膊頭嘅皮膚，隨住痛楚嘅感覺，我感受到我啲牙迅速變尖。
我就咁失去失命，從此會變成一隻無感情嘅喪屍，殺害人類......
咪住先，無喎，
五秒後，我好確定我大腦仲運作緊，諗埋好多亂七八糟嘅野。
但係，眼前一大堆喪屍，張開個嘴，對我虎視眈眈。
喪屍係唔會攻擊同類嘅，如果佢地發現我未變晒喪屍，會唔會咬多我幾啖？
無謂受多餘嘅痛苦啦，我即刻喺地上打個滾，滿面塵土，再企喺起身，張開嘴咆哮，儘量令自己顯得野性啲。
我都唔知呢個演繹岩唔岩，我睇喪屍片果陣，剩係留意逃跑嘅人類，都無望清楚喪屍嘅動作。
不過，眼前呢班喪屍無沖上黎咬我，應該過咗關，我鼓起勇氣加入喪屍堆，同佢地一齊向前衝啊！
加入喪屍團隊六個鐘，我好清晰地保有人類思想，並且完全無想咬人。
岩岩咬我果個係阿伯黎，可能阿伯生前裝咗假牙，假牙傳播喪屍病毒就打咗個折。
又或者，我身上有特別嘅抗體，令我保持理性。
但我可以點做？
我啲牙已經變尖咗，有喪屍特徵，如果我番去人類度，可能未開口講野，就俾人消滅咗。
我唯有留喺喪屍堆，等待時機。
好彩，未有喪屍發現我係冒牌嘅，我按捺住唔講野，唔發出任何有邏輯嘅聲音，同佢地沉默地前進。
喪屍隊去緊邊度呢？我又唔可以問其他喪屍，佢地都唔會明我講乜啦。
根據我睇喪屍片嘅經驗，喪屍隊係去追住人咬，
但仔細諗一諗，排前面嘅喪屍就咬人啫，如果成千上萬隻喪屍一齊跑，後排果啲永遠都唔會咬到人架喎。
望下我呢隊，目測都有幾百隻喪屍，中途亦有遇到其他喪屍隊，相安無事咁行。
沉默，前進。
呢一刻，我好肚餓，我可以點樣食野？唔通要跟班喪屍食人？
呢個時候，喪屍隊衝入一間快餐店。
成班喪屍馬上熱血沸騰，露出尖牙向前衝。店員紛紛尖叫，逃跑，但好快就俾我地追上。
呢個場面，就真正似我睇過嘅喪屍片。
喺其他喪屍推撞之下，我唔知點樣跌咗喺一個後生店員面前，大眼瞪小眼。
果一刻，我心中天人交戰。
我唔咬佢，我就會被喪屍隊發現身份，話唔定會將我分屍；
我唔咬佢，其他喪屍一樣會咬佢，佢一樣會變喪屍。
我努力張開口，擺出最猙獰嘅姿態，狠狠咬落佢隻手臂度（咬頸真係唔夠勇氣）。
好快，快餐店每個店員都變成喪屍。
渾渾噩噩間，我發現喪屍隊喺廚房拎緊野食，我都分到兩盒燒雞翼。
食緊燒雞翼嘅我，突然又覺得件事好合理。
呢隻喪屍病毒，似乎發作得好快，而喪屍又唔會攻擊同類，
咁就根本無機會食人，因為咬完第一啖，被咬者已經變咗喪屍。
但係喪屍都要能量，聽聞除咗人類外，喪屍都會攻擊動物，咁生食熟食都一樣係食。
將廚房搜刮一空後，我地帶住新加入嘅喪屍隊員，離開快餐店。
從此，我成為咗一隻全職冒牌喪屍。
我估，呢隻喪屍病毒同電影有啲唔同，啲喪屍會瞓覺，會食人類嘅食物。
始終「喪屍病毒」只係一個統稱，每種病毒都有少少唔同，所以我呢隻冒牌喪屍都可以勉強活落去。
但最辛苦嘅，係無得同人溝通。
我唔敢講野，甚至唔敢表露出有感情嘅眼神，每日睜開眼，又面對住無數木訥無神嘅眼睛。
保存人類思想嘅我，活喺喪屍羣，無比痛苦。
呢個團隊愈黎愈壯大，我亦將近崩潰。
直到有一日，我地行吓行吓，聽到一段廣播：
「專家最新研究確認，新型嘅H938，俗稱『喪屍病毒』，
起源係有人生食大量野生動物，然後牙齒變尖、失去人性、產生咬人嘅慾望。
但係，H938人傳人嘅能力非常弱，一般黎講，只會傳染到牙齒變尖果一部份。
亦即係話，俾H938患者咬到，並唔會失去常性，唔會變成我地所知嘅『喪屍』。」
即係話，只有一開始生食野生動物，頭幾個患上H938果班人，先係無常性嘅喪屍。
佢地所咬嘅人，全部都只係牙齒變尖，無失去理智，即係好似我咁？
咁講法，全球應該只係得幾隻真‧喪屍，
咁我身處嘅喪屍團隊，路上遇到成千上萬嘅喪屍，係咩回事？
我望吓左邊，望吓右邊，身邊每隻「喪屍」都露出疑惑嘅目光，面面相覷。
唔知邊個爆出一句：「搞咁耐，原來全部都係人！」
我呆咗，原來唔係我有咩特殊抗體。
只係每個人被咬後，都以為自己會變喪屍，
發現自己無變喪屍後，唔想顯露出「與眾不同」，就一齊扮喪屍。
為咗滿足基本嘅生存需要，我地去餐廳扮想咬店員，其實都只係想攞野食，根本無人想咬人嘛。
如果有一個人肯講自己無變喪屍，我地根本唔使捱咁耐。
但係，我自己都無勇氣走出黎講，我邊有資格要求其他人講？
每個人，都怕自己變成異類，被羣體排斥。
我地努力令自己顯得同其他人一樣，結果，我地最相似嘅，只有虛偽。
想分享作品給更多人看到？ 請即下載香港01 app到01撐場發表精彩創作！或將作品電郵至ugc@hk01.com，隨時敬候來鴻！
作者簡介：陳美濤
中文系畢業生，本地小說作者，以「貼地荒誕」為創作路線。對武俠小說情有獨鍾，喜歡分享個人見解。已出版小說：《無緣化蝶》、《港女九陰真經vs女神孫子兵法》等等，另有主持「口述武俠」影片頻道。
作者Facebook專頁：https://www.facebook.com/tomato28
【編按：文章題目為編輯所擬，原題為「我嘅職業係：冒牌喪屍 [短篇小說]」】
（以上文章內容均屬用戶提供，香港01不為任何用戶內容而衍生或遭受之任何損失或損害承擔責任。）