【溫多娜手記】Mastercard新標誌刪走集團名 得返紅黃圓圈

撰文:溫多娜
出版:更新:

新一年新開始,Mastercard今日做咗個大轉變,就喺用新品牌標誌。新標誌會將集團名「Mastercard」刪走,得返紅黃圓圈。

但改成咁,唔知客人仲認唔認得呢?Mastercard首席市場推廣及傳訊總監Raja Rajamannar話,公司之前做咗研究,發現就算冇咗「Mastercard」字眼,超過80%受訪者都可以靠紅黃圓圈圖案識別到佢哋品牌,未來集團會進一步推進品牌革新。新品牌標誌將會分階段出現喺各款信用卡、支付卡、實體同埋網上零售點。

Mastercard歷年來的品牌標誌。(集團新聞稿)

其實,呢個紅黃圓圈的圖案已經被公司沿用咗50年,代表集團將市民以及無現金支付連繫埋一齊。參考以往嘅標誌,「Mastercard」一字都會喺紅黃圓圈內,但到咗2016年,呢個字就放咗響紅黃圓圈外,「M」字和「C」字亦轉為細楷,新標誌就將「mastercard」字眼直接刪走。

外媒《CNBC》分析,Mastercard呢個舉動係想改變品牌形象,希望大眾覺得集團唔單止係提供信用卡服務,而係金融科技公司。另外,集團喺新聞稿亦自稱係數碼支付公司。