陳奕迅（Eason）的歌，90後不會陌生。縱使你不是陳奕迅fans，也一定會聽過《富士山下》、《人來人往》、《十面埋伏》、《夕陽無限好》等金曲。今年是陳奕迅踏入樂壇21周年，有Eason fans表示，最愛陳奕迅「做自己」性格、也愛陳奕迅的歌聲，有股特別的吸引力，「將你拉入去嗰首歌個空間入面」。

【點擊全螢幕觀看短片】

阿Wing及阿姜，分別是Eason七年及十年fans；阿姜笑言自己是「骨灰級fans」，訪問期間不單可背出演唱會中，Eason與歌迷談話的對白，更可背出Eason早前參演的電視劇《短暫的婚姻》對白，並指「我覺得係骨灰級fans應該會知囉！」

那麼是否要花很多心力去記住關於Eason的所有？「唔需要刻意，聽一次就比佢把聲有魔力咁，吸咗入我嘅記憶入面」。阿姜說。

另一名自稱只是「中級fans」的阿Wing，手提電話及智能手錶的鎖機畫面，分別是Eason的照片及她與Eason的合照，「電話一定係會隨身攜帶，同埋幾時都喺度，就好似佢一定喺你隔離陪住你！」

Eason小問答1：Eason的生日是幾月幾號？（答案在文末）

愛陳奕迅的聲音，也愛陳奕迅的自我

兩人也認同「陳奕迅嘅歌陪我長大」，阿Wing形容，陳奕迅的歌很有魔力，「如果你夜晚自己一個聽嘅話，就係會比佢吸住咗」，更會特意拿出CD機去聽Eason的歌。

阿姜就指，陳奕迅的歌，「咩場合咩時候咩地方都可以聽」，而除了歌喉以外，阿姜亦欣賞Eason率直的性格。「好似Eason’s LIFE演唱會咁，佢都有講自己好怕面對人，好怕自己失控，因為當時佢有情緒病，我諗我斷估唔會有其他歌手，同你（歌迷）分享佢有幾唔開心，或者幾有需要大家嘅支持」。

【另看】陳奕迅的歌陪大家成長！ 重新認識150句感動你的歌詞（上）

Eason小問答2：Eason在何年參加新秀？（答案在文末）

談到Eason的歌，兩人如數家珍，阿Wing在Eason’s LIFE演唱會中唱出《今日》最為感動，「只係個前奏響起，當堂就覺得正能量爆燈，同埋覺得自己個生命都幾圓滿」。

而另一首歌《新生活》，陪她渡過失落的日子。「歌詞入面有一句，『新生活要好好過』，淨係呢句已經夠，嗰一刻你已經唔記得晒之前啲嘢，重頭嚟過！」

至於阿姜，他就指Eason的《大個女》最能為他打氣。這首Eason送給其女兒的歌，歌詞提及「時光會逼你這副萬金之軀，競逐世上各樣乜乜之最，你若要做最尾一名絕對允許」。阿姜指，「唔開心嘅時候聽到呢隻歌，就會覺得Eason呵我，佢竟然同我講話你做最尾都唔緊要啦，佢咁樣呵返我，真係，冧晒！」

Eason小問答3：Eason在新秀時唱了哪首歌？（答案在文末）

與陳奕迅最接近的一次

每個fans都想見到偶像，追星、追看演唱會、逢簽名會必出席就少不免，但談到最接近偶像的一次，阿姜就指在澳門看完Eason演唱會，落船時發現自己與Eason同船回港，便等待Eason出現和與他握手，「佢隻手好淋、好暖、好厚肉，同埋佢係真誠地握返我，唔係淨係得我好大力咁捉住佢，所以嗰一下我都係感受到被愛嘅！」不過近距離見到偶像，始終也相當緊張，「好多說話都講唔出口，淨係識得同佢講『我真係好鍾意你、你頭先唱得好好』」。

【另看】陳奕迅的歌滿載友情親情　重新認識150句感動你的歌詞（下）

Eason小問答4：Eason第一隻碟的名字是？（答案在文末）

相比起阿姜，阿Wing的經歷更為驚喜。之前任職咖啡店的阿Wing，突然在店舖遇到Eason光顧，「佢一出現咗之後，當堂我就好緊張、心跳加速，因為我負責整嘢飲，你陣間就係要準備去整一杯嘢飲，親手交比你偶像」。

Eason期後亦有多次光顧，直至一次放假的阿Wing從同事口中得知，Eason打探「阿Wing有無返工」，阿Wing大喜，「當堂係覺得自己，嘩！喺佢心目中有啲地位呀大佬！其實都真係幾感動嘅！」

Eason小問答5：Eason背上的紋身是甚麼模樣？（答案在文末）

Eason入行轉眼21年，阿Wing指因為陳奕迅，數年前認識到一班Eason fans並成為朋友，至今仍一直有聯絡，感謝Eason帶給她友誼。阿姜指「好想多謝陳奕迅，教識咗我音樂係一個好好嘅傳送媒體，你用音樂治療咗好多人嘅人心，都多謝你將好好嘅音樂帶去我生命入面。」

【另看】細數林夕經典　25句感動你心歌詞

Eason小問答答案：

1.　7月27日2. 　19953. 　望月4. 　陳奕迅