「不要以貌取人」、「內在美比外在重要」這些說話人人都懂得說，但真正這樣想的人又有多少？日常生活中，不難聽到別人對其他人評頭論足的說話。其實我們在拿著一個怎樣的標準、憑甚麼以這套審美觀去批評別人？

點擊「全螢幕」觀看短片

如果問你覺得「靚」的定義是甚麼？臉尖尖、眼大大、鼻高高、白雪雪、長頭髮、瘦身材、嬌聲嗲氣，相信大多數人都沒有異議。這些社會上對美的所謂標準，很多人都會覺得理所當然。但是不符合這些標準的就真是「醜」嗎？醜和美的定義由誰來決定？為甚麼要跟著所謂標準來衝量自己？

從小聽盡刻薄批評

「我由細到大都因為外表好無自信，到大學都仲有因為個樣而喊。」今年24歲的小丸，從小到大都因為外貌受盡傷害。因為幼稚園便開始有比較，然後人愈大旁人的說話只會更刻薄，所以在一生中的20多年裡，已經聽過不少傷入心扉的說話。「其實我由頭去到腳，無一個地方無畀人話過。」

【另看】香港節奏快兼壓力大　澳門人：滿街都是resting bitch face

「我天生攣頭髮嘅，你知啦啲人個個直頭髮㗎嘛，跟住就會話『點解你攣頭髮嘅？好奇怪囉！』我呀媽呀哥都係直頭髮㗎喎，咁我係咪好奇怪呢？」

「跟住到眼啦，眼細啦，跟住就會話『你細到究竟睇唔睇到嘢㗎？』好奇怪囉女仔眼大先好㗎嘛！」

「塊面啦，方包面啦，連我呀媽都話砵仔糕面。」

「去到皮膚啦，皮膚黑啦，天生黑啲嘅，連親戚都話『你咁黑，去完非洲返嚟呀?』」

「身型啦，因為細個做運動，比較大隻，又會畀人話男人婆啦喎，『嘩！你一定食好多嘢啦咁大份！』」

「『嘩你咁細個，腳掌呀已經咁大隻，第時一定好難買鞋啦，著男人鞋啦你』。」

在旁人眼中，這些說話可能只是說笑，但對小丸來說，慢慢聽著聽著，也開始深信自己就是他們說的這樣差。「佢哋唔覺得有問題，覺得講笑姐，但係好多時依啲所謂嘅笑話，其實係可以衍生到語言暴力㗎嘛。」這些不懷好意的「笑話」，令她的自信心長期處於谷底，並造成無法磨滅的傷害，「小學同中學係一個幾孤獨嘅一個情況，肥婆啦、死肥婆啦...可能會話埋尼斯湖水怪呀...」而最難聽的一次，就是有人跟她說：「如果我係你，我死咗佢好過。」說這些話的人可能轉頭就忘得一乾二淨，而小丸雖然不想，但一字一句都刻了在她心中。

【另看】Long D註定分手？過來人教你5招維繫異地戀

因外貌遭遇不公平對待？

有一次她去面試，在等待的時候有個穿背心、化了妝的美女坐在她旁邊。然後當面試官出來叫小丸的名字後，很自然地笑意盈盈的走到美女面前。當美女說不是我，而小丸在旁邊舉手說是自己時，面試官的表情竟然一秒變沉重。「一路in嘅時候啦，基本上佢都無乜點望過我。我覺得會唔會太明顯啊sir！」

然後初中的時候，小丸是推鉛球的運動選手，有一次運動會上她又創佳績，老師太高興拿著咪高峰向全校宣佈：「有請我哋嘅楊中女大力士上台！」說罷全校的學生都瘋狂大笑，令小丸極不請願地上台。自此之後同學們都會用「女大力士」稱呼她。小時候會覺得這樣很尷尬丟臉，長大後小丸就當趣事一則分享。

拍廣告令自信大增

是甚麼令小丸突然自信大增，不再認為自己就是別人說的那麼差？「有次真係機緣巧合，幫某個電台拍咗個中秋節廣告。點知出咗街之後好多人話認得我喎『嘩！你笑得好甜呀，好得意呀！』咁我就覺得咦我係咪真係，唔係細個啲衰人口中講咁樣衰呀，咁差呀，咁唔死都無用呀。」

加上讀大學之後，幸運地認識到一班真心朋友，「係好開心識到唔同嘅朋友啦，真心朋友唔係靠樣，話你靚先識你，令我走出咗對外表嗰種絕望。」

發現個人特色最重要

小丸說，小時候真的有想過整容，「磨骨呀、隆鼻呀、眼整大啲，個個都做范冰冰嘛。」但現在想通後就覺得，「其實我都幾有特色呀，笑起上嚟都幾靚呀，整完仲係咪我呢？」

【另看】微胖女曾食藥減肥感人生無色彩　Giann： 唔想跟人哋目光去減肥

她話在這20多年的體驗中，最大的得著是知道了，自己的價值不是由別人幫你決定。「唔好畀社會所謂嘅標準，去否定自身嘅價值囉。」為甚麼要執著於別人說完就忘了的批評呢？只有他們的惡言值得你在意嗎？為甚麼不嘗試相信自己美好的部分？「所以如果仲未搵到自己價值或特色嘅朋友，恭喜你啦！因為你將會搵到！」