港鐵4線故障 其實係苦心提醒港人:上車真係唔容易

撰文:過期大學生
出版:更新:

「喺香港,上車真係好難」唔一定用喺買樓,地鐵只要壞車,全香港齊齊經歷上唔到車之苦。
香港年輕人、打工仔,咁辛苦為乜?上車囉!

多謝港鐵今日四條線崩潰,
令香港人不論係年輕人,
定係打工仔,
都對「上車」呢兩個字有新認識。

港鐵四線崩潰,大批打工仔濟留月台等上車。(資料圖片)

今時今日談及上車,
未必人人有共鳴,
不過講到「上班」,
就一定個個都知咩事,

今日當個個都想上車,
大家死等爛等,
以為總有一刻可以上到,
結果係架架車都滿座。

有時你肯等,都未必上到車。(資料圖片)

相關文章:
行街最怕遇到5種人 喼神、人牆 俾條路行下得唔得?

你肯等你肯捱,
就可以上到車喇咩,
你只要係中途站,
唔好講話上車,
排隊都冇你份,
知唔知點解?
因為你個站唔夠有利,
唔係你嘅錯,
係你輸在起跑線上。

就算上到車,果個都唔會係你。(資料圖片)

你會覺得,
只要我肯等,
總有一刻會到我,
可能你等得來,
已經收工。
有時仲有會接駁巴士,
美其名比多一個選擇你,
不過上到車果個,
永遠都唔會係你,

有時上到車,反而係一個負擔。(資料圖片)

相關文章:
「土地大辯論」有無你心水土地用途?年輕人:冇屋住講咩基建

咁係咪個個都上唔到車呢?
咁又唔係嘅,
有時好彩都會上到一兩個,
成功上咗車,
望住沿路等車的人,
有人覺得自己可以俯瞰眾生,
有人會為仲等緊車的人祈禱,
但佢哋都有一樣的諗法,
以為可以去到自己想去的地方。

上咗車,就唔可以落車。(資料圖片)

其實上咗車,
只係一切的開始,
因為一上車,
你就番唔到轉頭,
只可以一直搭著去,
當然可以早途落車,
但你等車、車費、心血,
都會一下子煙消雲散,
你甘唔甘心?

今日「上車」盛況:

+2

我諗起錢鍾書先生的《圍城》,
「圍在城裏的人想逃出來,
城外的人想衝進去」
係巴士、係樓市、係香港。

相關文章:
只有將軍澳人才懂7件事 商場圍城 康城輪迴

好似吹大咗,
冇咩事我返出去做嘢先,
利申我今日行路返公,
上唔上到車唔關我事,
我唔識。

過期大學生
曾經的大學生,80後老鬼,身老心不老,自問玩盡大學3年,勁爆回憶同美好經歷,足以講足30年。